Әмтнә неквр күцәхәр

24-10-2023, 09:10 | ---

Таңһчин Улсин Хуралын депутатнр батлгдсн диг-дараһар әмтнлә харһҗ, тедниг соньмсулҗах төрмүдәр цәәлһвр өгч дөңгән күргнә. Одахн таңһчин парламентин депутат, «Новые люди» партин әңгин һардач Гаджи Фероян видеоконференц залһлдана эварһар әмтнлә күүндв.

Дөрвн күн депутатла күүндәд, эдниг үүмүлҗәх төрмүдәр хувалцв. Тиигәд, таңһчин бичкдүдин эмнлһнә көдләчнр канцелярск эд-тавр хулдҗ авхд, балһсна бәәрн күүкд күн коммунальн туслмҗин өриг даңцахд, Элстин барун захд бәәдг улс олна көлгнә, усар тетклһнә төр хаһлхд, 1-ч микрорайонд бәәршлдг 4-ч «Б» общежитин улс болхла олна гер-бүүрт ясвр келһнд дөң болхиг сурв. Депутат күн болһнла күүндәд, зәрм төрмүдиг дор ормднь хаһлв, наадксинь эврә бүртклһнд авв.
Таңһчин Улсин Хуралын депутат Аюша Гилән «Негдсн Әрәсә» партиг дөңнлһнә штабд әмтнлә харһв. Дөрвн күн депутатла харһхар ирв. Теднәс һурвнь гер-бүүрин төр босхв, депутат эднлә күүндәд, күн болһнд цәәлһвр өгв. Дәкәд нег күн балһсна поликлиникин 6-ч микрорайонд бәәдг салврт цусна шинҗллт келһнә төлә шишлң эв-арһ уга болҗахиг заав. Энүнд күцц эмнлһ кехин төлә цусна шинҗллт эрк биш кергтә болҗана. Депутат тогтсн бәәдлиг эрк биш шинҗлхвидн, гиҗ үгән өгв.

БАТАН Наталья

Видео