Хәәртә экнрин санлд

26-10-2023, 09:30 | Общество

Эн җил хальмг улс хар гөрәр цааҗла харһад, арвн һурвн җилдән Сиврт тууврт бәәснә 80 җил болхмн. Мана ах үйин улс тууврин күчр зовлңгиг дааҗ һарсмн, күүнә һазрт даарад, өлсәд, күнд көдлмш күцәһәд, даҗргдсн болв чигн сойлан, авъясан хадһлҗ, төрскн таңһчурн хәрҗ ирв. Аавээҗнриннь санл тевчҗ, ач-тусинь хәрүлхәр һашута өөнд нерәдәд таңһчин райодт олн зүсн керг-үүлдврмүд бүрдәгдҗәнә. Одахн Баһ Дөрвдә районд тууврин җилмүдт күчр зовлңгиг дааҗ һарсн күүкд улсин санлд нерәдәд урһа модд суулһгдв. Шин аллей Баһ Дөрвдә хурлын өөр секгдв.

Эн әрүн чинртә керг-үүлдврин седвәриг «Цаһан седкл» гидг олна бүрдәцин болн таңһчин күүкд улсин олна ниицәнә районд үүлддг әңгин ахлач Пашкан Татьяна татв. Бәәрн улс энүнә седвәриг дөңнәд, алеей бүрдәх һазриг хог-богас цеврләд, энд сән таал тогталлһна болн хөөннь модд суулһлһна кергт шунмһаһар орлцв. Баһ Дөрвд селәнә 2-ч тойгта Увшин Кермнә нертә сурһулин болн Бадмин Батан нертә гимназин сурһульчнр, РМО-н һардврин, түүмр унтраллһна цергллтин, ветеринарн станцин көдләчнр болн бәәрн улс модд суулһх ормд хар һазр орулад белдв. Ик-бичкн уга эн кергт тәвцән орулснь ик буйнта керг болв.
(полную версию статьи можно посмотреть в бумажной версии выпуска № 117 (18956) 26 октября 2023 года, ЧЕТВЕРГ)

ДООҖАН Наталья
ЗУРГТ: Баһ Дөрвдт тууврин зовлң дааҗ һарсн күүкд улст нерәдҗ модд суулһҗах кем

Видео