Саата күүкд улсиг дөңнҗ

31-10-2023, 09:05 | Общество

Әрәсән социальн саңгин Хальмг Таңһчар үүлддг әңг эн җилин йисн сарин эргцд «Төрлһнә сертификат» гидг көтлврин медлд таңһчин эмнлһст 19 сай арслң йилһв. Эн мөңгн саата күүкд улст болн нилхдт медицинск туслмҗ күрглһнд олзлгдв. Эн җил 3500 күүкд күн болн бичкн эн мөңгәр эмнлһ авв.

Төрлһнә сертификат электронн эварһар өггднә, тегәд саата күүкд күн эмнлһнд ирсн цагт терүнә болн җил күрәд уга нилхин туск зәңг белн болна. Эн җилин эклцәс авн 1727 саата күүкд күн эмнлһ авхд 6,6 сай арслң олзлгдв. Тер мет 1711 нилх һарсн цагт 10,2 сай арслң болн җил күртлнь эрүл-мендин бәәдл шинҗллһнд 1,44 сай арслң йилһгдв.
Таңһчар үүлддг ОСФР-ин ах тооч Абушинә Өлзәтин келсәр, саата күүкд күн 30-ч долан хонгас авн эмнлһнд ирәд эмчин тоод авгдсн цагас авн сертификат авна. «Төрлһнә сертификат» гидг көтлврин медлд йилһгдҗәдг мөңгн эмнлһнә бүрдәцсин кергсл шинрүллһнд, эмәр тетклһнд, саата күүкд улст медицинск дөң күрглһнд олзлгдна.

БАТАН Наталья

Видео