Көдлмшнь күцәмҗтә болтха!

09-11-2023, 09:05 | Общество

Шидр таңһчин Улсин Хуралын (Парламентин) дарани сүүрин йовудт Байир Путеев сенаторт суңһгдв. Энүг Хальмг Таңһчин Толһач Хаска Бату йөрәв.

– Байир Эдуардович төрскнч седклтә күн мөн. Күч-көлснә хаалһан участкин эрдмчәр эклҗ, хөөннь Приютна района Первомайский поселкд механизаторар көдлҗ, дарунь селәнә эдл-ахун кооперативиг һардҗ йовла. Района Хургин депутатд суңһгдҗ, нег һазра улсин дунд күндллһ олв. 2020 җилд Приютна района һардврин толһачин үүл энүнд даалһгдв. Тер цагт район күнд таалд бәәсмн, Б.Путеев болхла көдлмшиг һартан авч, нүүрт һарһснь темдгтә. 2022 җилд Байир Путеев “Негдсн Әрәсә” партин региональн әңгин күцәгч комитетиг һардв. Энд бас сән көдлмш бүрдәҗ чадв. Цергә шишлң керг-үүлдврт орлцачнрт чигн дөңгән күргҗ туслв. Тер мет партин төсвс күцәлһнә йовудт сурһуль-эрдмин бүрдәцс ясгдв, таңһчин балһсдт болн селәдт сән таал тогталһнд бас шунмһаһар орлцсн болдг.
Байир Эдуардович шин үүлән даавртаһар күцәҗ, таңһчин төлә арһ-чидлән нөөлго көдлхд иткҗәнәв, гиҗ Бату Сергеевич темдглв.

ОЛЬДАН Цаһан

Видео