Байир Путеев сенаторт суңһгдв

09-11-2023, 09:15 | Общество

Урҗ өдр Элстд Хальмг Таңһчин Улсин Хуралын (Парламентин) хойрдгч сессь болв. Терүнд Хальмг Таңһчин Толһач Хаска Бату, ЮФО-д Әрәсән Президентин зөвтә элчллтин төв инспектор Александр Беляев, таңһчин залврин Ахлач Босхмҗин Гилән, вице-премьермуд, зөв-йосна болн зарһин органмудын элчнр орлцв. Сессин сүүриг таңһчин парламентин Ахлач Артем Михайлов һардҗ давулв.

Сессин эклцәр түрүн сүүрт гемин уршгар эс орлцсн депутат Хачира Борист таңһчин зака үүдәгч органа депутатын иткл цаасн болн темдг бәрүлҗ өггдв. Дарунь депутатнр Бачан Саглриг Яшалтан района зарһин участкин ниицлтин зарһчин үүлд һурвн җилә кемд батлв.
Эн сессьт ут тоодан арвн төр хәләгдв. Тиигәд, дәәнд орлцачнриг болн дәәнә цагт төмр хаалһин тосхлтд орлцачнриг һазрин участкар өңгәр теткхин төлә эднд балһснд эс гиҗ селәнд бәәснь цаг-болзг уга болхин туст һазрин хәрлцәнә туск таңһчин заканд сольвр орулгдв. Муниципальн болн шаңһа цергллтд көдлдг улсин туст бас закан сольгдв. Әрәсән Президентин шиидврәр баһчудын сән өдр мөчн сарин сүл бембә өдрлә темдглгддг болснас иштә эн өдр әрк-чаһр хулдшгон туст бас шиидвр батлгдв. Келхд, эн төр хәләгдсн цагт депутатнр шунмһаһар күүндврт орлцҗ, сүл цагт әрк-чаһр хулддг лавксин то баһрулх кергтә гив. Тиигәд, депутат Җанган Чимидин келсәр, Элстд әрк-чаһр хулддг лавксин то өдр ирвәс икдәд йовна. Болв эн төриг арднь орҗ хаһлх кергтә, юңгад гихлә арһлачнрин зөв бас харсх кергтә. Таңһчин залврин Ахлачин дарук-таңһчин финансин министр Шурһчин Очр алвна мөңгиг амрар авлһна диг-дараг (УСН) 2027 җил күртл утдуллһна төрәр зәңгллһ кев. Ода тер мөңгн райодын болн хотл балһсна бюджетд орулгдна, 2022 җилд эннь 586 сай арслң болв. 2025 җиләс авн эдн җил болһн 2 җува арслң авхмн гиҗ зуралгдҗана. Эн мөңгн муниципалитетмүдин делгрлтд туслна гиҗ темдглгдв. Депутатнр эн эв-арһ олзллһна цаг-болзгиг цааранднь утдулх шиидвриг нег дууһар батлв.
Сессьт хәләгдсн төрмүдәс таңһчин Улсин Хуралын (Парламентин) нерн деерәс Әрәсән Федерацин Хүүвин элчиг суңһҗ авлһна төр хамгин чинртә болв. Таңһчин Улсин Хуралын Ахлач Артем Михайлов эн үүлд депутат Байир Путеевиг батлх седвәр орулв. Байир Эдуардович парламентд «Негдсн Әрәсә» партин салвр һардна, 2018 җиләс авн Приютна района муниципальн бүрдәцин һардврт мергҗлт, хөөннь района толһач болҗ көдлсмн. Темдглхәс, эн района депутатнрин Хургин депутат болҗ үүлдв, арвн һар җилин эргцд бәәрн залврин органмудт көдлҗ байн дамшлт хоршав. 2022 җиләс авн «Негдсн Әрәсә» партин КРО-д нүүрлгч үүл дааҗ, партин сегләтрин негдгч дарук, региональн политсоветин президиумин гешүн билә. Таңһчин Улсин Хуралын доладгч хуралтын депутатнрин суңһврт орлцад, диилвр бәрәд, түрүн сессьт парламентин спикерин дарукд суңһгдсмн. Депутатнр Байир Путеевиг сенаторт нег дууһар дөңнҗ, таңһчин әмтнә сә хәәҗ күцәмҗтәһәр үүлдхнь маһд уга гисн ицлән медүлв.
- Намаг таңһчин зака үүдәгч органа нерн деерәс Әрәсән Федерацин Хүүвин элчд суңһснд таңһчин Толһачд, депутатнрт ик ханлтан өргҗәнәв. Таңһчин әмтнә төлә үннчик седклтәһәр көдлхүв, би мана хальмг улсин үрн болнав. Мини иргч көдлмшин ашар мини үүлдвриг үнлхит. Хамдан нөкцҗ үүлдхвидн гиҗ би ицҗәнәв. Тана даавриг эрк биш иткүлхв, – гиҗ Байир Эдуардович келв.
Дарунь мандатн комиссь депутат Байир Путеев цаг-болзгасн урд үүлдврән төгсәснә туск тогтаврин төсв орулв, депутатнр терүг нег дууһар дөңнв.
Сессин чилгчәр депутатнр олн зүсн төрәр күүндәд, иргчдән усар болн электрокүчәр тетклһнә, балһсна олна көлгн-күчнә бүрдәциг дөңнлһнә болн нань чигн төрмүдиг «залврин част» тодрхаһар хәләх кергтә гисн сүв-селвг орулв.

ДООҖАН Наталья

Видео