Ачта эмч – таңһчин күндтә иргн

09-11-2023, 09:20 | Общество

Шидр Хальмг Таңһчин залврин Ахлач Босхмҗин Гилән болн таңһчин эрүл-менд харлһна министр Саран Булат Әрәсән эрүлменд харлһна йилһән сән көдләч, Хальмг Таңһчин ачта эмч Мария Кавкишевна Убушиевад золһҗ одв. Гиичнр Хальмг Таңһчин Толһач Хаска Батун даалһврар ачта эмчиг «Хальмг Таңһчин күндтә иргн» гидг нерн зүүлһгдснлә йөрәв.

Увшин Мария таңһчин эрүлменд харлһна халхд җирн шаху җилдән үнн-чик седклтәһәр көдләд, олн дунд күндтә болн ик ачта күүнд тоолгдна. Мария Кавкишевна 10 миңһн һар месллһ кеҗ, кесг күүнә әм аврҗ күнд гемәс эдгәсмн. Эн 1928 җилд моһа сарин 8-д һарсмн, нәәмн настадан өнчрв. Сурһулян сәәнәр сурдг төләдән бичкн күүкн «Артек» лагерьт армх путевкар ачлгдсмн. Актюбинск мүҗин медицинск эгчнрин сурһульд сурчасн цагтан эн маальг болн оңһадг хальдврта әәмшгтә гемәс хөрлһнә кергт орлцсмн. Хөөннь эн Алма - Атан эмнлһнд көдлсмн. 1957 җиләс авн Алма- Атан медицинск күрәлң төгсәснәс авн энүнә җирһлин хаалһ таңһчин эрүл-менд харлһна делгрлтлә бат залһлдата бәәсмн. Мария Кавкишевна өөдән мергҗлттә эмч болсн деерән таңһчин олна бәәдлҗирһлд шунмһаһар орлцҗ, КАССР-ин Деед Хүүвин, партин бюрон сегләтр болҗ үүлдҗ йовла. Әрәсән оториноларингологудын номин ниицәнә Хальмг әңгин ахлач болҗ Увшин Мария бас күцәмҗтәһәр үүлдҗ, баахн эмчнриг белдлһнд, мергҗлт өөдлүллһнд тәвцән орулсмн.
Мария Кавкишевнан авальнь Петр Дорджиевич Бакаев Басан Городовиковла хамдан төрскн таңһчан босхҗ, селәнә эдл-ахун делгрлтд ик тәвцән орулсн төләдән 2010 җилд «Хальмг Таңһчин күндтә иргн» гидг өөдән нер зүүсмн. Эдн һурвн күүкндән чик сурһмҗ өгч, өлзәтә сән үрд өскв. Ууһн Галина күүкнь экиннь үлгүрәр эмч болв, дөчн һар җилдән эрдмәрн көдлҗ йовна. Эльза күүкнь Әрәсән номин академин Хальмг номин төвин һардачин дарук болҗ көдлҗәнә, тууҗин номин докторин цолта. Мария Кавкишевнан үлгүрәр күүкднь болн зеенрнь эмчин эрдм шүүҗ авснь темдгтә. Ода деерән 7 күн эрүл-менд харлһна халхд көдлҗәнә. Эндр медәт йирн тавта наста болв чигн таңһчин эрүл-мендин халхд болҗадг хүврлтсәр соньмсна.
Хальмг Таңһчин залврин Ахлач Босхмҗин Гилән Мария Кавкишевнаг цаһан седкләсн йөрәҗ, бат эрүл-менд дурдв. «Мария Кавкишевна, та цуг маднд төрскн һазртан болн эврәннь улстан үнн кевәр цергллһнә үлгүр-үзмҗ болнат. Бидн тана җирһләр бахмҗ кенәвидн. Эндрк ачлвр цуг мана нег һазра улсин ханлт болҗана», – гиҗ Гилян Герасимовна келв.

Барт белдснь ДООҖАН Наталья
ЗУРГТ: таңһчин залврин Ахлач Босхмҗин Гилән болн эрүл-менд харлһна министр Саран Булат Мария Кавкишевна Убушиевад ачлвр бәрүлҗ өгв

Видео