Улсин негдлтин байр Элстд

09-11-2023, 09:25 | Общество

Элст балһсна Диилврин паркд улсин негдлтин Өдрлә хотл балһсна әмтиг цуглулсн ик байр болв. Байрин керг-үүлдврт Элстин болн Хальмгин архиепископ Юстиниан, Рубцовск болн Алейск епископ Роман, таңһчин сойлын болн зуульчллһна министрин дарук Герман Санджарыков, Элст балһсна һардврин толһачин дарук Дмитрий Довгополов, Бурхн Багшин Алтн сүмин нерн деерәс гецл Бадма, Хальмгин лал шаҗна заллтын ахлачин селвгч Аслудин Калабегов болн келн-улсин ниицәсин һардачнр орлцв.

Байрт цуглрҗ ирсн әмтиг архиепископ Юстиниан йөрәв. Москва хотл балһсиг һазадын орна булаһачнрас сулдхсна тууҗиг ахрар тодлулад, архиепископ Казанск кафедральн чонҗин байрла болн Улсин негдлтин Өдрлә цугтаг үнн седкләсн йөрәһәд амулң-менд җирһл дурдв.
Әмтиг хамцулдг кесг байр нег өдр ирлцҗ темдглгдҗәхинь Юстиниан тодлад, Казанск бурхн шаҗна байр даңгин әмтнә җирһлд бәәсинь зааһад, тууҗин илт йовдлмудла тернь залһлдатаһинь медүлв. Ут тууҗин туршт Төрскән хамдан харсад, ни-негн бәәдг олн келн-әмтн шин цагт Улсин негдлтин Өдрин байран темдглдг болв. Алтан крайин нерн деерәс хальмг улсиг эн байрла епископ Роман йөрәһәд, эрүл-менд бәәхиг, көдлмш күцәмҗтә болхиг дурдв. Хальмгт байрин эн өдрмүдлә ик евәлтә Коробейниковск шүтә авч ирв. Олн улст эрүл-мендән батлхд, хаҗһр йовдлас гетлҗ, чик хаалһар йовхд туслдг йоста хәәрн эн. Бурхн Багшин Алтн сүмд Бурхн Багш таралңгин орнас һазрур залрҗ ирсн ончта байр ик мөргүләр болн нань чигн евәлтә тоотар әмтнд тодлгдв.
Улсин негдлтин Өдр шаҗна олн байрла ирлцҗ, әмтнә җирһлд урмд өгчәнә.
Байрин ик концертд «Зултрһн», «Сударушка», «Степняночка» ансамбльмуд болн бииһин коллективс орлцв. «Веснушки», «Джунгария», студия «21 век» гидг ансамбльмудын билгиг әмтн бас сән меднә. Эн өдр чигн билгтә биичнр олн элстин бәәрн әмтнд болн гиичнрт сергмҗ үүдәв.

ҖИРҺЛИН Кермн

Видео