Әәмшг уга бәәдл теткхәр

Маңһдур орн-нутгин дотр-дундын бүрдәцсин көдләчнр сән Өдрән темдглхмн. Эдн өдр-сө уга мадна төлә әәмшг уга бәәдл тогтахар шунна. Зеткртә йовдл учрхла хамгин түрүнд бидн зөвйос харлһна көдләчнрәс нөкд болхинь күләнәвидн. Шишлң телефона тойгар җиңнүләд, полицин көдләчнр тер дарунь гилтә ирнә.
Сән Өдринь угтҗ, бәәрн улсин нерн деерәс олн җилдән Элст балһсна болн райодын селәдин уульнцст әәмшг уга бәәдл тогтаҗ йовсн, таңһчин МВД-н ветеранмудт болн эндр церглҗәдг көдләчнрт дәкнәс ханлтан өргҗәнәвидн.
2023 җилин йисн сарин то-дигәр, таңһчд әәмшг уга бәәдл тогтагдв, гиҗ МВД-н барин цергллт зәңглҗәнә.
Бүтәгдсн күнд кергүдин тонь 452-т күрв, эннь урдк тооһас баһрв, гиҗ темдглх кергтә. Ут тоодан эн җилин йисн сарин туршарт зөв-йос эвдсн 1166 керг илдкгдв. Тер мет хулха кесн кү алсн, эрүл-мендд харшлт күргсн, коррупцин халхар болн талдан йовдлмуд баһрсмн.
Сүл җилмүдт Интернетын эварһар болн телефоһар олн-әмтн мек-тах һарһдг улст меклгдәд, мөңгән геедг зәңг даңгин соңсгдна. Өдгә цагт эн төрт онц оньг тусхагдна. Терүнәс нань терроризмин, наркотикүд уга келһнә туст шишлң көдлмш күцәгдҗәнә болн иргнмүдин миграцин төр бас онц бүртклһнд бәәнә.
Элст балһсна болн райодын селәдин уульнцст олн-әмтн йовдг һазрт зеткртә болн хаҗһр йовдл һарһдг улсин то баһрснь бас байрлулна. Насни дигт күрәд уга арвтнрин туст бүтәгдсн кергүд бас баһрв, гиҗ таңһчин МВД зәңглв. Туула сарас авн хулһн сар күртл талын орна иргнмүдин туст долан керг бүтәгдснь илдкгдв.
Тер мет хаалһин зокалыг эвдәд, зеткртә йовдлмуд дару-дарунь учрдг болв. ГИБДД-н көдләчнр болхла эднә туст бас ирлцңгү көдлмшән күцәнә.
Полицин көдләчнрин һол кергнь зөв-йос эвдсн йовдлмудыг урдаснь гетлҗ, эн туст цәәлһврин көдлмш күцәлһн мөн.
Тогтсн авъясар, полицин көдләчнрин сән Өдрлә хамгин түрүнд ведомствин ветеранмудыг йөрәҗ ач-тусинь хәрүлнә. Тер мет МВД-н һардвр өдгә цагт дааврта кергән күцәҗәдг зәрм мергҗлтнриг Күндллһнә темдгүдәр ачлхмн.
Эврә газетин нерн деерәс, полицин көдләчнриг сән Өдрләнь йөрәҗәнәвидн, көдлмшнь күцәмҗтә болтха гиҗ дурдҗанавидн.
КАРСАНА Евгения