Донормудын җисә делгрүлхәр

09-11-2023, 09:50 | Общество

Баһ наста, бат, чаңһ-чиирг болн эрүл-менд баһчуд эврә сән дурар цусан өгч донормудын җисәнә шунмһа орлцачнр болхин төлә мана орн-нутгт #ДавайВступай! гидг керг-үүлдвр бүрдәгдв. Һаха сарин 1-д эн Улан-Удэ балһснд экләд, үкр сарин 10-д Москвад ВДНХ-д секгдсн «Әрәсә» гидг һәәхүлин талвңд төгсхмн. Ут тоодан эн керг-үүлдврт мана орн-нутгин 72 балһсн орлцҗана. Эн акцин йовудт олн зүсн харһлт, флешмоб болҗана, нертә артистнр болн спортсменмүд орлцҗ, цусан өглһнә чинрин тускар олнд медүлҗ, донормудын җисә дөңнҗәнә.

Үкр сарин 1-д эн акц Элстд болв. Хотл балһсна төв талвңд цус гүүлгдг таңһчин төвин мобильн бүрдәц көдлв, эврә сән дурар цусан өгхәр ирсн улс эн кергиг дөңнв. #ДавайВступай! гидг керг-үүлдврт «Вторая жизнь» гидг саң бүрдәһәч, чимгнә донормудын җисәнә элч Артем Алискеров болн Әрәсән ФМБА-н гематологин болн цус гүүлһлһнә Кировск номин-шинҗллтин күрәлңгин донорск җисә делгрүллһнә әңгин һардач Наталья Малышева орлцв. Күндтә гиичнриг Хальмг Таңһчин залврин Ахлачин дарук, таңһчин социальн делгрлтин, күч-көлснә болн көдлмшәр тетклһнә министр Өлзәтин Марина болн таңһчин эрүл-менд харлһна министр Саран Булат хальмг һазрт ирснләнь бүләнәр тосад, мана таңһчд эврә сән дурар цусан өгч гемтә улст дөңгән күргдг улсин то өсхд эн керг-үүлдвр туслх гив.
- #ДавайВступай! гидг керг-үүлдвр донорск җисә дөңнхин төлә цуг мана орн-нутгар давҗана. Мана Элст балһсн эн акцд орлцҗадг 62-ч балһсн болв. Мана таңһч эн төсвиг дөңнҗ, шунмһаһар орлцҗана. Артем Алискеров эн керг-үүлдврин элч болҗ, күнд бәәдлд туссн улст дөңгән күргҗәнә. Эн бийнь күнд гемәр гемтәд, җирһлин күнд таалд тусад, эмнлһ авсна хөөн эдгәд талдан улсиг дөңнх күслтәһәр эн төсвин седвәр татсмн. Энүнә төсв мана орн-нутгт сәәнәр делгрҗәхәс иштә кесг күн эдгх гисн ицлтә бәәнә. Мана таңһчар давх 42 дууна марафон цаһан хаалһта болтха, – гиҗ Марина Петровна дурдв.
Артем Алискеров һаха сарин 1-д Улан- Удэ балһснд марафоһан экләд, хулһн сарин 31-д Әәдрхнд күрв. Шидр эн мана хотл балһснд ирв. Эн лейкоз гидг күнд гемәр гемтәд, 31 дәкҗ химиотерапий кесмн, 1-ч багин эрмдгтә күн болсн бийнь эн арһ-чидлән агсҗ Цугәрәсән керг-үүлдвр бүрдәв. Гүлгн гемәр гемтхәс урд Артем олн зүсн спортивн марһаст орлцсмн. Нидн болхла эн Европин хамгин өндр уул Эльбрус деер давшв, Әрәсән балһсдар гүүһәд, 303 дууна һазр эргв. Давсн җилд һучн һурвта Артем Алискеров чимгнә донормудын төрт олн-әмтн оньг тусхахиг некәд, Байкал нуурин көвәһәр 700 дуунад гүүһәд, ультрамарафо давулв.
Артем Алискеровин келсәр, эн керг-үүлдвр эклснәс авн арвн зурһан миңһн күн донормудын тоод немгдв. «Хальмг Таңһч мана ик орн-нутгин нег әңгнь болна, тегәд би тана өврмҗтә таңһчур ирхәр седләв. Җил хооран «Вторая жизнь» гидг саң бүрдәгдв, бидн донормудын җисә делгрүлх, хол бәәдг һазрт мана үүлдврин тускар медүлх күсл тәвсн бәәнәвидн. Дәкәд чимгнә донор болхд ямаран чигн әәмшг уга гиҗ бидн әмтнд цәәлһнәвидн. Нанд донор уга билә, тер учрар би удан цагтан эмнлһ авсн биләв»,– гиҗ Артем маднд келв.
Ода деерән мана таңһчд 350 күн чимгнә донормудын шаңһа тоод орсн бәәнә. Тедн дунд Росгвардин көдләч Амадей Бовгонов. Эн 2019 җиләс авн эврә сән дурар цусан өгч, донор болҗ әмтнд дөңгән күргҗ йовна. Нидн намрар эн түрүн болҗ чимгнә донор болв, Амадей Андреевичиг «Донорск җисә делгрүллһнд ач-тусан күргсн төлә» гидг ФМБА-н медаляр ачлв.

БАТАН Сәәхлә
ЗУРГТ: #ДавайВступай! гидг донорск җисә дөңнлһнә кергүүлдврт орлцачнр

Видео