Бурхндан мөргәд

09-11-2023, 09:55 | Общество

Җил болһн бурхн-шаҗнд шүтдг әмтн Бурхн Багш 33 бурхна таралңгин орнас бууҗ ирсн евәлтә өдриг темдглнә. Әмтн ик байртаһар темдглдг өдр эн җил үкр сарин 4-лә ирлцҗәнә.

Номин гүүнд шүтәд Бурхн Багш Гегәрлтин хаалһд орхларн һучн һурвн бурхна деедсин орнд залрхар һарсмн. Таралңгин тер орнд өңгрснәннь хөөн энүнә экнь залрсн бәәҗ. Экиннь ач-тусиг хәрүлхәр Бурхн Багш таралңгин орнд ном хәәрлсн болдг. Моһлцг һазрин әмтн хәрү һазртан бууҗ иртхә гиҗ Бурхн Багшиг сурсмн. Тиигәд һазрин әмтнә сурврар бууҗ ирсн өдр евәлтә болҗ, байрин өдр болҗ тохрв. Шаҗнд шүтдг әмтн эн өдр Бурхн Багштан зальврҗ, номин цәәлһврт орна. Санкасия гидг һазрт Бурхн Багш бууҗ ирсн болдг. Эннь өдгә цага Энткгин һазр болҗана.
Бурхн Багшин Алтн сүмд эн әрүн өдр байрин олн керг-үүлдвр болхмн. Өрүн тавн часла әмтн ирҗ, гевш Чангчубин һардврт цевр-цер бәәлһнә цер авна. Шагшавдын туст туслдг эн цер 24 частан бәргдх зөвтә.
Йисн часла байрин ик мөргүлд әмтн орлцхмн. Бурхн Багштан мөргәд, иргчин хаалһан секәд, әмтн хальмг цәәһән ууһад, боорцгар тоогдад, хурлан зөв эргәд, зальврад седкл төвкнүн хәрхмн. Амр биш эн цагт Бурхн Багшин номин евәл цугтад күртх болтха.
Ом-мани-падме-хум!

УШКАНА Сувсн

Видео