«Теегин айс» марһанд диилвр бәрв

09-11-2023, 10:10 | Общество

Хар Һазра района Комсомольский поселкд Саша көвүн бәәнә. Билгтә эн көвүнә дуулсн дуд селәндән темдгтә. Районд болдг чинртә кергүүлдврмүдт болн олна ямр нег нәәрт эн көвүн ду дуулҗ орлцна. Могульджинә Саша дуулхинь әмтн күләнә.

Билгтә көвүн Комсомольск дунд сурһулин тавдгч класст орна. Бичкдүдин үүдәлтин герт дууна эрдмиг көвүн арднь орҗ дасна. Саша дуунд, көгҗмд дурта улсин бүлд төрсмн. Энүнә экнь көгҗмин багш, домбр цокна, сәәхн дуулна. Эцкнь Могульджинә Петр кесг наадмд орлцад нер туурсн «Цецг» гидг коллективд биилҗ йовла.
Көвүн дуулхдан дуртаһинь түрүләд экнь үзҗ оньган өгсмн. Эн билгән делгрүлтхә гиһәд Байрта Бюрчиевна заавр өгәд, дөң болсмн. Хальмг ик сурһуль төгсәһәд, эн Элстин көгҗмин училищд орад домбр цокдг эрдм дасв. Ода Байрта Бюрчиевна Комсомольский поселкин бичкдүдин үүдәлтин герт көдлҗәнә. Тегәд көвүндән көгҗмин медрл заахд, дууна эрдмиг дасххд хоршасн дамшлтнь сән дөңцл болҗана. Көвүндән дуран өгсн эрдминь сәәнәр дасххар Байрта Бюрчиевна зүткнә. Олн ду дасад, Саша ик дуртаһар дуулад, концертст орлцна. Хальмг келән сән меддг көвүн шаваш келдг сәәхн эрдмиг чигн дасч авв.
Билгтә көвүн кесг марһанд орлцв. «КТК – билгтә бичкдүдт» гидг марһанд Могульджинә Саша негдгч мөрән лауреат болв. Дииләчнрин тоод билгтә көвүн эн җилин бар сард Москва орҗ, тенд «Москва үүрмүдән тосчана» гидг байрин керг-үүлдврмүдт орлцх зөв авв. Терүгинь темдглсн сертификат көвүнд бәрүлҗ өггдв.
«Хальмгин дун» гидг таңһчин марһанд, «Самородки России» марһанд Саша хойрдгч мөрән лауреат болсмн. 2022 җилд «Хамдан» гидг бичкдүдин үүдәлтин таңһчин марһанд бас Саша хойрдгч девсңгин лауреатын нер зүүсмн.
Бичкдүдин өслтд, теднә билгин делгрлтд эк-эцкин, аав-ээҗин дөң ик чинртә болдгинь Могульджинә өрк-бүлин үлгүр медүлҗәнә. Сурһулян сәәнәр сурад, дууна эрдмән ясрулад бәәсн деерән көвүн биилхдән дурта. Саша «Цецг» ансамбльд эцкин үлгүрәр биилҗ йовна. Көвүнә хойр ээҗнь дуунд, көгҗмд бас дурта улс мөн. Олна керг-төрт тедн орлцна. Өрк-бүләрн, элгн-садарн цуглрсн цагтан эдн цугтан дуулад, бииләд, цаган сергмҗтәһәр давулна.
«Теегин айс» гидг телеүзлин марһанд Могульджинә Саша негдгч мөрән лауреат болв. КГТРК-н седкүлч Надбитә Тамаран келсәр, эн җилә марһан хальмг көгҗмч Манҗин Аркадийин санлд нерәдгдлә. Марһанд орлцачнр Хальмгин Баатрин олн ду дуулх зөвтә бәәсмн. Тегәд соньн йовдл учрв. Нертә көгҗмчин төрскн Комсомольский поселкас марһанд орлцсн Могульджинә Саша сәәхн дууһарн әмтнә оньг авлв. «Төрлмүд мини» гидг дууг Саша айсинь сәәхн орулҗ дуулсн деерән дууна учр-утхинь медүлҗ чадсиг жюри темдглв.
Саша бийнь болхла эн марһанд орлцх күсл бәәснә тускар келнә. «Эн дуунд хальмг улсин ухан-седкл йир сәәнәр медүлгдҗәнә», – гиҗ баһ наста дууч тоолҗана.
Хальмгин һазриг көгҗмәрн делкәд туурулсн билгтин төрсн һазрт иим билгтә көвүн өсчәхнь йир сән йорта йовдл болҗана.

ХӨӨЧИН Галина
Зургт: Хар Һазра района билгтә дууч Могульджинә Саша

Видео