Хальмг шүлгчин алтн медаль

09-11-2023, 10:25 | Общество

Эн өдрмүдт Моңһлд шүлгләнә ик байр болҗана. Моңһл келтнрин шүлгчнр негдгч ик хуралтдан цуглрҗ ирв. «Моңһл дугаар зуун» гисн нерәдлһтәһәр тернь давҗана. Моңһлын, Шинҗәнә, Өвр Моңһлын, Бурятин, Хальмгин шүлгчнр орлцҗана.

Терүнд орлцх зөв авхин төлә болсн ик шүүвриг 100 күн дундас 29 шүлгч давҗ һарсмн. Хальмг келнә болн утх-зокъялын багш Канкан Эрднь теднә тоод, шүлгләнә байрт орлцҗана.
Шүлгләнә байрин эклцд таңһчин элч Канкан Эрднь Хальмг Таңһчин Толһач Хаска Батун йөрәлин бичгиг хургин орлцачнрт умшҗ өгв. Таңһчин Толһачин йөрәлин үгиг өөрд-хальмг келәр соңссн шүлгчнр ик өргмҗтәһәр терүгинь тосв. Хаска Батун йөрәлин үгд орсн тоолвр болһниг альх ташҗ, таасч цуглрсн шүлгчнр тосв.
Өвр Моңһлас ирсн Нарн Билгин келсәр, «Байр ик болад, зүркндм багтлго деврәд һарчана. Седклим девтәсн үгмүд келснднь ханлтта бәәнәв». Олн нань чигн шүлгчнр тиим седкл җөөлн бәәв. Хальмгин Толһач шүлгчнрин хуралтд тиим ик оньган өгснь теднд җивр урһаһад, эдн тер седклин залинь һазр болһндан күргҗ, эврә әмтнд медүлхнь маһд уга.
Моңһлын һазрт бәәсн өдрмүдтән Байн Делгр сомонд одв. Тенд моңһл шүлгч, түүкләч олна үүлдәч Дашдоржийн Нацагдорж төрсмн. Өдгә цага моңһл утх-зокъялын улынь тәвсн бичәчин төрскн һазрт олн шүлгүд соңсгдв. Шүлгчнр Чингс хаана бумбд күрч, күндллһән медүлв. Бәәрн улсла болсн олн харһлтс ирсн гиичнрт икәр таасгдв.
Баһ Нур балһснд моңһл келтнрин шүлгчнрин товчлгч өдрнь давв. Канкан Эрднь келсәр, эннь йоста ик байр болв. Шүлгүд, йөрәлин үгмүд хоорнд ут дун соңсгдҗ, көгҗмин зевсгүдин ә эн цуглранд өргмҗин бәәдл тогтаҗав. Үгдән халсн шүлгчнр эдниг тооҗах эздүдт нерәдсн шүлгүд тер дарунь бичәд, умшад, цугтад сергмҗ үүдәҗәв. Ашлгч эн өдр Канкан Эрднь «Уул келн» гидг шүлг бичәд, цуглранд ирсн үүрмүдтән умшад, ик тааслт олв. Моңһл келтнрин шүлгчнрин негдгч хуралтын алтн медаляр болн Күндллһнә дипломар хальмг шүлгч мөрәлгдв.
Эн ик күндтә үүлдврт күцәмҗтәһәр орлцад, Хальмгиннь нерән дуудулсн шүлгч болн багш Канкан Эрднь Цаһан-Нур селәнд төрсмн. Хальмг ик сурһуль төгсәсмн. Ода эн Октябрьск района Ик Царң селәнә 2-ч тойгта М. Хониновин нертә сурһулин һардач болҗ көдлҗәнә. Хальмг Таңһчин һардврт, Таңһчин Толһачин администрацин һардач Кирилл Поповд, Октябрьск района толһач Увша Басңд, Улсин Хуралын (Парламентин) депутат Амикә Лиҗд, «50 лет Октября» АО-н генеральн директор Владимир Цыбулинд, «Техмашсервис» ООО-н генеральн директор Нимгрә Викторд, арһлач Четыра Татьянад Моңһл орхднь дөңгән күргснднь Канкан Эрднь үнн седклин ханлтан медүлҗәнә.
Цуг эднә дөңгин нилчәр шүлгч, багш моңһл келтнрин шүлгчнрин ик цуглранд орлцад, Хальмг Таңһчд урн-үгин зөөрт ик оньг өггдгинь үзүләд, шүлглән ик делгрлт авчахинь медүлв.

УШКАНА Сувсн

Видео