Бичкдүдин эмнлһиг дөңнх үгән өгв

09-11-2023, 12:49 | Общество

Шидр Хальмг Таңһчин Улсин Хуралын (Парламентин) депутат Гаджи Фероян таңһчин бичкдүдин медицинск төвд одад, эмнлһнд кергтә оргтехник, «Omron» тамһта тонометрмуд болн канцелярск эд-тавр авч ирв. Давсн сард бичкдүдин эмнлһнә көдләчнр депутатд эрлһ бичәд, дөң болхиг сурсн билә. Әмтнлә харһад күүндсн цагтан Гаджи Ростамович олн эрлһс дундас бичкдүдин эмнлһнд эрк биш дөңгән күргх шиидвр авсмн.

Манҗин Валентинан нер зүүҗәдг таңһчин бичкдүдин медицинск төв мана таңһчд ик гисн эмнлһсин негнь болна. Энд өдрт 800 күүкн-көвүнд медицинск туслмҗ күрггднә, эрүл-менд шинҗллһн, эмнлһн күцәгднә. Ут тоодан энд 118 һар туслмҗ күрггднә. Төвд 200 һар күн көдлнә, 30 педиатрическ участк үүлднә. Харм төрхд, зәрмдән эмнлһнд йилһгдҗәх мөңгнә кемҗән баһ болад, ямр нег дөң күргхин туст кемтг учрна. Үлгүрнь, ОРВИ болн грипп түгҗәх цагт түрүн дөң күргхин төлә фильтр-бокс секх кергтә болна. Болв терүнә үүлдвр дигтә-дарата болхин төлә оргтехник, канцелярск эд-тавр бачм керглгднә. Тиим төр учрдгин тускар эмнлһнә көдләчнр эврәннь эрлһдән зааһад, депутатла хувалцсн билә.
Гаджи Ростамович эднә эрлһиг кесг талдан бичгүдәс йилһәд, эрүл-менд харлһна көдләчнрт кергтә кергсл болн эд-тавр хулдҗ авхар шиидв. Удан боллго депутат фильтр-боксин төлә цугинь авч ирв.
- Бичкдүдиг дөңнлһнә, эднд сән эмнлһ күцәлһнә төр эркн чинртә, тегәд би цааранднь эмнлһнә бүрдәцлә хамцу үүлдҗ, дөң-тусан күргхв. Иргчдән бидн медицинск төвлә хамдан олн зүсн төсв күцәхәр зуралҗанавидн, - гиҗ Гаджи Ростамович келв.
Бичкдүдин эмнлһнә бүрдәцин ах эмч Дорҗин Александрла хамдан депутат төвин хорас хәләһәд, ямаран туслмҗ энд күрггддгәр соньмсв. Фильтр-боксин төлә кергтә техник болн канцелярск эд-тавр хулдҗ авснь терүнә үүлдвр кемтг угаһар бүрдәгдхин төлә туслв гиҗ эмчнр темдглҗ, депутатд ханлтан өргв.

ДООҖАН Наталья
ЗУРГТ: таңһчин Улсин Хуралын депутат Гаджи Фероян таңһчин бичкдүдин эмнлһнд одсн кем

Видео