Селәнә эмнлһнд дамшлт хоршаҗана

11-11-2023, 09:50 | Общество

Хальмг Таңһчин эрүл-менд харлһна министерствин зәңглсәр, эн җилин йисн сарин туршарт «Земск эмч/фельдшер» гидг шаңһа көтлврәр 20 эмч болн 14 дунд медицинск көдләч таңһчин эмнлһст көдлмшт һарв. Нидн эн көтлврин медлд 37 күн бооца батлад, селән һазрт бәәдг эмнлһст көдлдг болв. Шаңһа көтлврәр эмч 1-с авн күсдундур сай күртл арслң, фельдшер болхла 500-700 миңһн арслңга дем нег дәкҗ авна. Тер мет эн көтлврт орлцад бооца батлсн улст таңһчин бюджетәс гер-бүүр нәәмәдлһнд сар болһн 5миңһн арслң өггднә. Сүл арвн негн җилин эргцд эн көтлврт 428 эмч болн 69 фельдшер орлцад, селәнә эмнлһст көдлдг болв.

Лаганя района эмнлһнә ах эмч Николай Шараповин келсәр, «Земск эмч/фельдшер» гидг шаңһа көтлврәр 12 эмч болн 3 фельдшер көдлмшәр теткгдв. Нидн нааран һурвн баахн эмч ирв, эннь хирург, педиатр болн эндокринолог. Баһчуд ах үүрмүдиннь дөңгәр дамшлт хоршаҗ, мергҗлтән өөдлүлҗ, селән һазрт бәәдг улст чинртә эмнлһ кехәр шунҗ көдлҗәнә. Җил хооран нааран ирсн эмчнр дунд Цернә Гилән бәәнә. Эн эндокринолог эмч болна. Сүл цагт цусан шикр өөдлсн улсин то икдәд йовна, тегәд эднд иим мергҗлтин хәләврт эрк биш бәәҗ эмнлһ авх кергтә болна. Гилән Батыровна иим гемтә улст килмҗән тусхаҗ, эмнлһинь диглҗ дөңгән күргнә.
(полную версию статьи можно посмотреть в бумажной версии выпуска № 122 (18961) 11 ноября 2023 года, СУББОТА)

ДООҖАН Наталья
ЗУРГТ: Лаганя района эмнлһнә эмч Цернә Гилән көдлмштән

Видео