Түрүн дөң күргхин төлә

23-11-2023, 09:15 | Общество

«Негдсн Әрәсә» партин «Эрүл-менд иргч» гидг төсвин медлд Т.Хахлынован нертә медколледжин улд медицинск эгчнрин эрдм даслһна сурһуль цааранднь давулгдҗана. Әрәсән Орн-нутгин Хүүвин депутат, эрүл-менд харлһна Комитетин ахлач Башанкан Бадмин седвәрәр иим сурһуль цуг субъектсәр бүрдәгдҗәнә.

Энүнә йовудт әмтн түрүн дөң күрглһнә туст медрл болн дамшлт хоршаҗ авна. Шидр УФСИН-ә Хальмг Таңһчар үүлддг заллтын көдләчнр сурһуль сурх шиидвр авв. Ода деерән эдн кичәлмүдт хоршаҗ авсн шин медрлән батлхин төлә медколледжин багшнрин һардврт дамшчана.
«Эрүл-менд иргч» гидг төсвин олна хүүвин гешүн, медколледжин һардач Манҗин Кермнә келсәр, эн сурһульд орсн әмтн дунд олн эрдмтә улс бәәнә, тедн дунд баһчуд чигн, наста улс чигн бәәхнь темдгтә. Сурһуль сурх санаһан медүлсн улс бичкн багмудт хувагдв, тегәд кичәлмүдин йовудт күн болһнд онц оньг тусхагдна. Эн сурһульд орлцсн улс түрүн дөң күргҗ, шарх-шав эд-бод кеҗ, бачм бәәдл учрсн цагт бийән чикәр бәрсн деерән талдан улст дөң күргдгиг дасхна.
Темдглхәс, урднь чигн Әрәсән Орн-нутгин Хүүвин депутат Башанкан Бадм УФСИН-ә Хальмг Таңһчар үүлддг Заллтын көдләчнрин төлә эмнлһнә халхар сурһуль давулҗ, шишлң аптечкс белглсн билә.

ДООҖАН Сәәхлә
ЗУРГТ: УФСИН-ә көдләчнр түрүн дөң күргдгиг дасчана

Видео