Түрү бәәдлиг дааҗ һарсн хальмгуд

23-11-2023, 09:30 | Общество

Эн җилин чилгчәр хальмг улсиг хар гөрәр цааҗла харһулад, төрскн һазраснь нүүлһснәс авн 80 җил болхмн. Залу улс Төрскән харсгч Алдр дәәнә һалвд орҗ залу-зөрмгән үзүлҗ хортнла ноолдҗ йовсн цагт гертнь зуг көгшд, күүкд улс болн бичкдүд үлдсмн. Киитн үвлин өрүһәр эднә герт салдсмуд орҗ ирәд, хол Сиврүр авч һарсмн. Мана таңһчд дәәнә болн тууврин күчр зовлңгиг эс үзсн өрк-бүл уга. Бидн бас цуг хальмг улсла хамдан җирһлин адрута хаалһар йовҗ, арвн һурвн җилдән күүнә һазрт бәәһәд, өөрхн элгн-садан гееһәд, төрскн таңһчурн хәрҗ ирләвидн.

ХОЛ ХААЛҺИН ЗОВЛҢ

Дәәнә өмн мана өрк-бүл Иҗл һолын көвәд Далвңга района Малый Марсым бичкн селәнд билә. Энд хөрн шаху өрк-бүл бәәсмн, бәәрн улс заһс бәрҗ терүгәрн теҗәл кедмн. Мана эк-эцк дөчн һурвтадан зурһан үртә улс бәәсн мөн. Бидн нег-негән дахлдад һарсн, мана эгч Уснц арвн дөрвтә, дарунь арвн хойрта Очр, арвта Бадм-Церн, нәәмтә Боова, би, Эрднь, зурһата болн отхн Лавгин дөнтә бәәсмн.
Хальмг улсиг цааҗла харһулхин өмн дала гидг чон, арат, туула болн нань чигн зерлг аңгуд мана һазрт үвләр ирв. Мана гер селәнә захд билә, тегәд хам-хоша бәәдг улс заһсна богиг мана өөр овалдг билә. Асхлад нарн суухин өмн селәнәхн мана герин өөр цуглрдгиг тодлнав. Эдн овалһата заһсна богин дотр ик төмр хавх бултулчкад, юн бәргдхинь күләдмн. Зерлг аңгуд богд овалгдсн заһсна үлдлиг идхәр гүүҗ ирдмн. Түрүләд арат ирәд, богиг тараһад, идхән идәд йовҗ оддмн, хөөннь чон гүүҗ ирдг билә. Зәрмдән чон болн арат хамдан йовхнь үзгддмн. «Чон арат хойр хамдан йовдмн биш, энтн му йор» гиҗ көгшд келснь тодлглна.
(полную версию статьи можно посмотреть в бумажной версии выпуска № 127 (18966) 23 ноября 2023 года, ЧЕТВЕРГ)

ҺӘРӘН Эрднь, Ик Буурла района күндтә иргн

Видео