Әрәсәд өрк-бүлин җил зарлгдҗана

25-11-2023, 09:00 | Общество

Шидр Әрәсән Президент Владимир Путин 2024 җилиг өрк-бүлин җил гиҗ зарлхин туск зәрлг батлв. Орн-нутгин залвр бар сарин 27 күртл өрк-бүлин җил давуллһна бүрдәмҗин комитет тогтаһад, терүнә хань дигләд, һоллгч керг-үүлдврмүдт кергтә мөңг батлх зөвтә гисн даалһвр өггдв. Бүрдәмҗин комитетин ахлачд Әрәсән залврин Ахлачин дарук Татьяна Голикова батлгдв.

«Өрк-бүлин социальн харслтын халхд күцәгдҗәх шаңһа политикиг делгрүлхин, өрк-бүлин чинр өөдлүлхин, нилхд төрлһиг урмудлхин, экнриг дөңнхин төлә 2024 җилд Әрәсәд өрк-бүлин Җил давулхиг тогтаҗанав» гиҗ орн-нутгин толһач һаран тәвсн зәрглт келгдҗәнә.
Әрәсән Президент үкр сард өрк-бүлин авъяс хадһллһна, күүнә зөв болн бат өрк-бүлиг харслһна шаңһа политикин ул тогтагҗ керг-үүлдврмүд батлсн билә. Әрәсән Федерацин Хүүвин Ахлач Валентина Матвиенко Әрәсәд дәкәд нег дәкҗ өрк-бүлин Җил давулхин болн өрк-бүлин зөв харслһна Келн-улсин зура белдлһнә седвәриг орн-нутгин толһачд орулсн билә. 2007 җиләс авн Әрәсән Президентин зәрлгәс иштә җил болһн ямр нег төрт нерәдгднә. 2008 җилд Әрәсәд өрк-бүлин Җил болсн билә. Экин Өдр угтҗ Әрәсән Президент өрк-бүлин чинр өөдлүлх зәрлг батлснь басл темдгтә йовдл болҗана гиҗ санх кергтә.

БАТАН Наталья

Видео