Һәәхүл бахмҗ үүдәв

25-11-2023, 09:15 | Общество

Хальмг Парламентд «Шин улс» гидг фракцин һардач, депутат Гаджи Фероян Москвад «Әрәсә» гидг нарт-делкән ик хургт Хальмг Таңһчин һәәхүл хәләв.

-Хальмг Таңһчин һәәхүләр олн әмтн соньмсҗ, нааран таасч ирҗәхин тускар би соңсад нааран ирв. Мана һәәхүл ке-сәәхн болн өвәрц болсн деерән әмтиг сәәнәр тосч, билг-эрдмәрн байрлулҗахнь темдгтә. Эн өдрмүдт һәәхүл келн-улсин спортд нерәдгдсн билә, тегәд олн зүсн даалһвр күцәҗ, спортивн наадмудла таньлдҗ, нааран ирсн улсла күүндүв. Цуһар мана һәәхүл таасгдсиг зааҗ, энд шаһа болн шатр наадҗ, саадгар хаҗ, хальмг улсин сойлла таньлдҗ ду-бииһәр бахтвидн гив. Би чигн бас цуг гиичнрлә хамдан хальмг улсин ду-би хәләҗ сергв, седклм байрар дүүрв. Эн һәәхүлд мана ик орн-нутгин субъект болһн эврәннь күцәмҗин тускар медүлҗ, келн-улсин сойлла, авъясмудла таньлдулҗана. Тегәд цуһар нааран ирҗ мана Әрәсән күчнә, ниицлтин болн байн тууҗин тускар үзҗ-медҗ авх зөвтә, - гиҗ депутат келв.
Тер мет депутат таңһчин спортын министр Батыра Константинла харһад, спортивн бүрдәцсиг дөңнлһнә болн олн зүсн төсв хамдан күцәлһнә тускар күүндв.

ДООҖАН Наталья
ЗУРГТ: депутат Гаджи Фероян таңһчин спортын министр Батыра Константинла һәәхүлд харһсн кем

Видео