Күндтә гиичнр Хальмгин һәәхүл хәләв

30-11-2023, 09:00 | Общество

Үкр сарин 4-д байрин бәәдлд секгдсн «Әрәсә» гидг һәәхүл мана орн-нутгт ниитә кевәр бәәдг олн келн-улсин сойл, авъяс, тууҗ медүлҗәх ончта керг-үүлдврт хүврв гиҗ келх кергтә. Түрүн һурвн өдрин эргцд терүг 450 миңһн күн хәләв. Мана таңһчин һәәхүл цуг наадк субъектс дунд зөвтә орман эзлҗ, хальмг улсин сойлын байн зөөрлә, келн-улсин билг-эрдмлә, тууҗла таньлдулҗ, селәнә эдл-ахусин, мана арһлачнрин кеҗ һарһдг эдл-ууш, кесг эд-тавр үзүлҗ, олна оньг авлҗана. Шидр мана һәәхүлиг хәләхәр Әрәсән Орн-нутгин Хүүвин Ахлач Вячеслав Володинә һардвртаһар депутатнрин делегац ирснь темдгтә йовдл болв.

Күндтә гиичнриг Хальмг Таңһчин то-дигин делгрлтин министр Этән Алексей тосч авв. Келхд, эн өдрмүдт мана һәәхүлд то-дигин делгрлтин министерств болн Баһ Дөрвдә район соньн көтлвр белдҗ, ирсн гиичнриг таңһчин бәәдл-җирһллә болн күцәмҗлә таньлдулҗана. Әрәсән Орн-нутгин Хүүвин делегацин ханьд мана нег һазра улс, эрүл-менд харлһна комитетин Ахлач Башанкан Бадм болн зуульчллһ делгрүллһнә төрәр бәәдг комитетин Ахлач Тарбан Саңһҗ ирснь байрта болв. Бадм Николаевичин келсәр, Орн-нутгин Хүүвин Ахлач Вячеслав Володин, «Негдсн Әрәсә» партин фракцин һардач Владимир Васильев, КПРФ-ин ахлач Геннадий Зюганов болн депутатнр Хальмг Таңһчин һәәхүлиг өөдәнәр үнлв. Хальмг би биилсн күүкд гиичнрин седкл байсав, зәрм депутатнр шатр наадв, наадкснь саадгар хаҗ үзв. «Хальмг үнн» газетин ах редактор Бембин Евгений ирсн гиичнрин нердиг тод үзгәр бичҗ эднд белглв. Хальмг улсин хуучн бичмр гиичнриг өврүлҗ соньмсулв. Нертә җаңһрч Манҗин Баатр хальмг улсин олн зүсн нааддын, тер тоод нәрн шинҗин тускар цәәлһҗ өгв. Хальмг Таңһчин ачта артист Мукөвүнә Кутлан мөрн хуур татҗ, хальмг ду дуулҗ ирсн гиичнрин чикнә хуҗр хаңһав.
(полную версию статьи можно посмотреть в бумажной версии выпуска № 130 (18969) 30 ноября 2023 года, ЧЕТВЕРГ)

ДООҖАН Наталья
ЗУРГТ: Әрәсән Орн-нутгин Хүүвин депутатнр Хальмг Таңһчин һәәхүл хәләхәр ирсн кем

Видео