КҮҢКЛ УХАТА АҺУ ИК БИЛГТ

19-03-2024, 14:40 | Общество

Өөрд-хальмгин сойлд аһу ик нертә күн кен гихлә – тод үзгиг бүтәгч, өөрдин бичгин келни сүүриг тәвгч, сойлын һармһа зүтклһн, маш сән орчулач, олмһа келтә шүлгч, кетркә мергн номт, шар шаҗна делгрүлгч Намкаҗамц Зая-пандита мөн болдг.

Оһтрһуийн Далай Зая-пандита өөрд улсин номин, урн үгин делгрлтд күргсн ач-тусинь үнлҗ болшго. Юңгад гихлә цецн ухата эн күүнә нилчәр ик кезәнәс авн өөрд-хальмг улс эврә бичг-тамһта болсмн.

Оһтрһуийн Далай Зая-пандита 1599, Зүн Һар орн-нутгт нег хошуд күүнә өрк-бүлд төрҗ һарсмн. Төрхәрә нернь Шар Хавг гидг билә. «Сарын герл» гидг Зая-пандитын намтрин дурсхлд иигҗ бичәтә бәәнә: «Яснь хошуд, отгнь гөрәчн, гөрәчн дотран шаңһас болна». Баһ цагтан хошуда Бәәвһәс хаана көвүнә ормд Төвд орҗ бурхн шаҗна халхар сурһуль сурсмн. Төвдт хөр һар җилин туршарт сурһуль сурсна хөөн хәрҗ ирәд, моңһл келн улс дунд будда шаҗ делгрүллһнд чидлән әрвлго, цуг бийән өгсмн. Хуучн дурсхлмуд, тер тоод Раднабадрин «Сарин герл», Баатр-Увш Түмнә «Дөрвн өөрдин тууҗ», Гавң Шарвин «Дөрвн өөрдин тууҗ» умшад хәләхлә, Зая-пандит Зүн Һар нутган бәәтхә, Дөрвн Өөрд нутгасн һатлад цуг Моңһлтнрин кевтәднь маш ик алдртад, тоомсртад йовсмн гиҗ сангдна. Рабҗамба Зая-пандита, Ламин гегән, Намка Җамц, Богдо гегән, Оһтрһун Далай, Тойин Равҗамб, Цецн Равҗамб, Хуврг Цецн, Өөрдин Равҗамб, Ачта Цорҗ Зая-пандита – гидг олн цолта нердүд дурсхлмудар хадһлгдад Зая-пандидтын цуг моңһлтнрин улст ик чинртә бәәсинь сәәхн герчлжәнә.

(полную версию статьи можно посмотреть в бумажной версии выпуска № 27 (19009) 19 марта 2024 года, ВТОРНИК)

МАҢҖИН Намру

Видео