Алтн болсн тавн үрнь

04-04-2024, 09:10 | Общество

Күн болһна җирһлд өрк-бүлнь хамгин хәәртә, эңкр болна, чидл-омг өгч ямаран чигн түрү-зүдү учрв чигн цугинь дааҗ һархд туслна. Байрта зәңгәрн бидн хамгин түрүнд өөрхн улсла хувалцнавидн, ямр нег төр учрхла бас теднә сүв-селвг авхар адһнавидн. Тегәд чигн седклд туссн үр-иньг харһхла, бидн байр-зовлңган әдл хувалцҗ, ачнр-зеенрән өскч, олн җилдән ниитәһәр бәәнәвидн. Хойр җил хооран «Җилин сән гисн өрк-бүл» гидг Цугәрәсән марһана региональн девсңд диилвр бәрсн Санл болн Любовь Кадаевихнә өрк-бүл бәәсәрн байн, суусарн өнр болҗ, ән-тер уга бәәнә. Тавн үрнь эк-эцкдән хамгин үнтә зөөрнь болна.


Хойр иньг зөвтә гихлә


Санл болн Любовь хамдан Троицкое селәнә Г.Жуковин нертә дунд сурһульд сурч йовсмн. Сурһулин хөөн Любовь Ростовск мүҗд Донской аграрн ик сурһульд сурв, Санл болхла Элстд көлгн-күчнә болн хаалһин колледжин оютн болв. Нег дәкҗ зуни амрлһна кемд эдн үүрмүдтәһән хамдан харһхларн нег-негән үзәд, седклән медлцәд, терүнә хөөн салад уга. Дунд сурһуль сурч йовсн цагтан Люба энүнә зүрк авлсна тускар Санл авальдан зуг хөөннь келв. Дала үг уга, номһн, цаһан седклтә Санл дуран өгсән келҗ чадлго дотран зовад бәәҗ. Люба терүгинь оньгтан авлго бәәв, зуг ода хөр һар җилдән хамдан бәәһәд, авальнь хамгин ицгтә иньг болҗахиг эн медҗ үнлв. 2001 җилд эдн өрк-бүлән өндәлһәд, эн җилмүдин эргцд нег-негнәннь заң, авг-бәрц медәд, дуран хадһлҗ седкл туссн иньгән олсндан байрта бәәнә.

- Санл көдлмшч, һартан эвтә, келсн үгдән күрдг, дааврта, йоста хальмг залу мөн. Хамдан көдлҗәдг үүрмүднь энүг күндлҗ тевчнә, һардврнь чигн сән мергҗлт гиҗ өөдәнәр үнлнә. Мана тавн үрнд эн бат түшг болҗ, ямаран чигн төр хаһлҗ, сүв-селвгәрн болн бүлән үгәрн урмд өгнә. Мини җирһлин хаалһд иим иньг харһснд хөвдән ханнав. Эләд хойр көвүмдн гемтә-шалтгта, тегәд Санлын дөңгәр, дурна чидләр бидн күнд цагиг дааҗ һарвидн, - гиҗ Любовь бер келнә.

Зәрм залус күнд цагла зулад, дөңгән күргхин ормд зуг бийиннь сә хәәдг чигн йовдл учрна. Эрмдгтә үрд асрхд хойр дам дааврта болна, эк-эцк тесвртә болҗ, нег-негән дөңнх зөвтә. Көдлмштән чигн Санл Кадаев күцәңгү көдләч болна. Эн Троицк усна сурвлҗна багд олн җилдән көдлҗәнә. Усна сурвлҗна турва хаһрад ямр нег бачм бәәдл учрсн цагт энүг эрк биш дуудҗ, ясвр кехиг сурна. Санл Баирович өвдгцә усн-бальчгт орад чигн көдлмшән күцц кеһәд, эвдрсн тоотынь ясад, олн улст тусан күргнә.

(полную версию статьи можно посмотреть в бумажной версии выпуска № 34 (19016) 4 апреля 2024 года, четверг)

ДООҖАН Наталья
ЗУРГУДТ: өнр-өсклң Кадаевихнә өрк-бүл

Видео