Нег һазра баатрмудын үлгүрәр

Сарпан района Салын Тугтн селәнд өнр-өсклң бүлд өсч-боссн Васькан Нимгр бичкнәсн авн шулун-шудрмг, тевчңгү, төрскн һазртан хару көвүн болҗ өсв. Һурвн көвүтә өрк-бүлд эн дундкнь болна. Ах-дү һурвн хамдан ниитә, эк-эцкдән нөкд болад, чаңһ-чиирг, дааврта, йоста хальмг баатрмуд болад өссмн.

Эк-эцкнь мал өскәд, һурвн үрән бичкнәснь авн эн кергт орлцулад, цуг тоотынь зааҗ өгв. Дунд сурһулян төгсәсн хөөн Васькан Нимгр Москван экономикин болн зөвин ик сурһулин Элстин әңгд орҗ сурв. 2014 җилд эн цергт мордв. Дарук җилд Нимгр Әрәсән харслтын Министерствлә бооца батлад, Севастополь балһснд Хар теңгсин флотд «Зеленый Дол» нертә кермд церглв. Тер мет Сирийск Арабск Республикд дәәнә керг-үүлдврт бас орлцв. 2016 җилд Балтийск балһснд бооцаһар цааранднь церглсн болдг. Һурвн җил давад, Васькан Нимгр хәрҗ ирв.
Цаг-зуур амрад, эк-эцкиннь үлгүрәр баахн көвүн мал өскхәр шиидв. Эдн көвүһән дөңнәд, Приютна районд хош хулдҗ авв. Юңгад мел Приютна районд кергән бүрдәхәр шиидсинь сурхла, – идгүд энд сән, – гиҗ Нимгр хәрү өгв. Эдл-ахуһан бүрдәһәд, баахн фермер мал өскв. Энүнд эк-эцкнь цугинь зааҗ, ах-дү хойрнь бас ирәд нөкд болдмн. Тиим кевәр Нимгр тавн җилдән мал өскәд көдлҗәлә. 2024 җилин ноха сард болхла, эн төрскнч седклин дуудврар орн-нутган харсхар шиидәд, бооца батлад, цергә шишлң керг-үүлдврт орлцв. Церн ахдан малан даалһчкад, Васькан Нимгр Төрскән харсхар адһв. Эндр Церн ахнь КФХ-г чадмгар һардҗ мал асрҗана.
Өдгә цагт Төрскән харсач Васькан Нимгр Херсонск мүҗин зөрүллтд «Днепр» нертә шишлң әңгд, нег һазра хальмг командирин һардврт церглҗәнә. Нимгрин келсәр, СВО давҗадг һазрт цуһар ахнр-дүүнр мет олна кергән күцәҗәнә. Гертәсн хол бәәһәд, өөрхн элгн-саднаннь, нег үлү дурта авалиннь болн бичкн күүкнәннь тускар санхла, зүркн байрар дүүрәд, цергә даалһвран улм даавртаһар күцәхд урмд өгнә, гиҗ көвүн темдглв.
Цергә даалһвран үнн-чик седклтәһәр күцәҗ, диилвр делдҗ, баахн дәәч гертән әмд-менд ирәд, цаарандан мал өскхәр зуралҗана. Эн туст цуг таал тогтагдв. Эн җиләс авн орн-нутгин Президент Владимир Путин цергә шишлң керг-үүлдврт орлцачнрин төлә «Агромотиватор» нертә көтлвр батлв. Тегәд Төрскән харсч йовдг улс цергә даалһвран күцәһәд, гертән ирәд, селәнә эдл-ахун халхар көдләд, таңһчин экономикд тәвцән орулҗ чадхмн, гиҗ темдглх кергтә.
Хальмг Таңһчин һардврт, волонтермудт, буйнч седклтә нег һазра улст Васькан Нимгр ик ханлтан өргҗәнә, тер юңгад гихлә цуһар дулан хувц, хот-хол, эм болн талдан тоот даңгин илгәнә.
Һурвн алдр баатр һарсн Салын Тугтн селәнд өсч-боссн Васькан Нимгр теднә үлгүрәр төрскн һазриннь нерән дуудулҗ, орн-нутган зөргтәһәр харсч йовна.

КАРСАНА Евгения