«Бидн - Әрәсә» төсв күцәгдҗәнә

Келн-улсин оркестр «Бидн - Әрәсә» гидг шаңһа төсв күцәлһнә йовудт гастрольн үүлдврән эклҗәхин тускар «Хальмг» РИА-д болсн брифингд келгдв. Келн-улсин оркестрин һардач Нимгрә Оксана, оркестрин художественн һардач Катан Савр, оркестрин көгҗмч Онкудан Наталья брифингд орлцҗ, гастрольн хаалһсин тускар келҗ өгв.

Нимгрә Оксанан келсәр, эн җил «Бидн - Әрәсә» гидг шаңһа төсвд орлцхар 100 коллектив эрлһ орулҗ өгсмн. Теднәс 60 коллектив шүүҗ авгдсмн. Тер тоод хальмг оркестр орснь ик байрта йовдл болҗана. Төсвин йовудт түрүн концертән мөрн сарин 11-д Волгодонскд, дарунь Әәдрхнд, аштнь Грозный балһснд хәләһәчнр оркестриг тосч авхмн.
Оркестрин художественн һардач болн дирижер Катан Савр эн йовдлын чинринь темдглв. Соньн эн төсвд көгҗмин хойр коллектив орсмн. Тернь Туван болн Хальмг оркестрмүд мөн. Келн-улсин көгҗмиг олн улст күргҗ медүллһн, тер дотр нертә көгҗмчнрин үүдәврмүдлә олн хәләһәчнриг таньлдуллһн ик дааврта керг болна. Коллектив терүгинь медәд, ик өргмҗтәһәр белдәд, олн көтлврмүдәсн сәәнинь тер концертстән үзүлхмн. Келхәс, хальмгин сойлыг мана эргндк регионмуд сән меднә. Урднь чигн тенд концертс үзүлсн биләвидн. Әрәсән сойлын министерствин дөңгәр күцәгдҗәдг эн керг-үүлдвр орн-нутгин коллективст болн олн хәләһәчнрт туста.
Оркестрин 20 көгҗмч эн гастрольд йовҗана. Домбр, йочн, мөрн хур, ятх, лимба, товшур, нань чигн келн-улсин зевсгүд хальмг көгҗм татхмн. Артистнр гастрольд йовхдан дурта болдгинь темдгләд, көгҗмч Онкудан Наталья хальмг көгҗмиг талдан һазрин әмтнд медүллһн эднд урмдта болҗахин тускар келв.
Мөрн-хөн сармуд коллективин үүлдврт концертсәрн темдгтә мөн. Хөн сард хол хаалһд һарч йовад, Сиврин зәрм балһсдар концертс үзүләд, Тувад күрәд, тенд наадмд орлцад, концертсдән үзүлхмн. Дарани харһлтдан хальмг коллектив ик даавртаһар белдҗәнә.
Хол хаалһасн ирәд, Москвад Келн-улсин оркестрин концертс мөчн сард болхмн.
Терүнәс нань һардач Нимгрә Оксана зааҗ келсәр, оркестр Әрәсән харслтын Министерств бүрдәҗәдг ик концертд орлцхмн. «Әрәсән әәрм дуулҗана» гидг эн концерт Советск Әәрмин театрин ик концертн залд болхмн. СВО-д орлцачнрт болн Москван цергә округин цергчнрт концерт нерәдгдҗәнә.

ҖИРҺЛИН Кермн