Дәәчнрин нердиг илдкхәр

Төрскән харсгч дәәнә җилмүдт Хальмгин һазрт чигн дәәлдән болҗасмн. Хәәврин багмудт орлцачнр дәәлдән болҗасн ормст һазр малтад, хорсн дәәчнрин цогциг олҗ авчана. Седвәртә баһчудын эн көдлмш һаза дуларсн цагт кегднә. Эн җилин хаврар хәәврин багд орлцачнр дааврта эн үүлдврин түрүн девсңгинь күцәҗ йовна. Советск салдсин цогциг эдн малтҗ, һарһҗ авв.
Баһчудын кергүдәр бәәдг Хальмг Таңһчин агентствин болн Президентск мөрәсин Саңгин дөңгәр төрскән харсачнрин цогцнь хәәгдҗ, нерднь илдкгдҗәнә. Сәнцг бәәрнд хәәврин экспедицин йовудт советск салдсин цогцин ясн олҗ авгдв. Терүнә өөр хувцна зәрм әңгнь, сахлан хусдг тоот, тос хадһлдг кегдл болн тәмкин гер олдснь соньн гих кергтә. Олдсн цуг тер тоот гүүнәр шинҗлгдәд, салдсин неринь медҗ авх арһ хәәгдхмн.
Хулхтын меҗәд кегдҗәдг хәәврин көдлмшт даруһас Әәдрхнә, Новороссийскин, Сарпулин хәәһәчнр орлцхмн. Хәәврин көдлмшин ашт олдсн салдсмудын цогцнь Алдр Диилврин 80 җилин өөнд нерәдсн санлын ик митингин йовудт 28-ч Әәрмин дәәчнрин санлын бумблвд оршагдхмн. Төрскән харсачнрин зөргтә үүлдвр мартгдх зөв уга. Сүүлңк салдсин цогц эс оршагдтл дән төгсәд уга гисн тоолвртаһар хәәһәчнр хәәврин көдлмшән кеҗәнә. Төрскнч седклтә баһчудын болн нань чигн өр-өвч седклтә улсин күцәҗәдг хәәврин көдлмш ик чинртә керг болҗана.
Дәәнд әмнәсн хаһцсн цергчнриг күн кевәр оршаҗ, санлынь күндлхәр эдн цаган, медрлән, шунлтан әрвллго көдлҗәнә.

ҖИРҺЛИН Кермн