«Сурһуль-эрдмин нүүрләчнр»

Шидр, мөрн сарин 12-т, «Әрәсә» гидг Келн-улсин төсвд «Сурһуль-эрдмин нүүрләчнр» гидг Цугәрәсән төсвин тавдгч кем эклв. Эн төсвд орн-нутгин сурһуль-эрдмин халхин делгрлтд тәвцән орулх саната багшнр, оютнр, сурһулин бүрдәцсин һардачнр орлцҗ чадҗана. Эн төсв «Әрәсә – кесг эв-арһин нутг» «Баһчуд болн бичкдүд» гидг келн-улсин төсвсин йовудт президентск төсвин халхар күцәгднә.
Зурһан җилин эргцд эн төсвд ут тоодан 300 миңһн багш, оютн болн сурһуль-эрдмин бүрдәцсин һардачнр орлцв. Терүнд орлцачнр дундас 26 миңһн күн эрдмин халхар күцәмҗтәһәр үүлдхин туст сүв-селвг авв, марһанд диилвр бәрсн 45 күн дааврта үүлд батлгдв, 136 күн региона кадрмудын саңд орулгдв. Эн җил «Медиа», «Государство», «Культура» болн «Наставничество» гидг шин әңгүд секгдв.
Нидн Хальмг Таңһчд «Сурһуль-эрдмин нүүрләчнр» гидг Цугәрәсән төсвин марһанд 11 күн орлцсн билә. Эдн сурһуль-эрдмин бүрдәцин делгрлтин көтлвр тогтаһад, төсв белдәд олн зүсн даалһвр күцәсн билә. Таңһчин марһанд Городовиковск балһсна Б.Б.Городовиковин нертә олн халхин гимназин сурһмҗин төрәр үүлддг һардачин селвгч Наталья Шевцова, Городовиковск балһсна 3-ч тойгта сурһулин орс келнә багш Анастасия Кривенец, Целинн района Троицкое селәнә «Алтн түлкүр» бичкдүдин садын ах сурһмҗлач Алла Тактинова диилвр бәрв.
БАТАН Сәәхлә