Үнтә белгүд шүүҗ авв

Нарн өдрлә Элст балһсна Диилврин талвңд «Балһсан цеврүлий» нертә керг-үүлдврин ашинь диглҗ, урмдулгч лотерей болв. Мөрн сарин туршарт күн болһн Элст балһснд хог-бог цуглуллһна кергт орлцад, лотерейд орлцх зөв авсмн. «Опора России», «Деловая Россия» олна бүрдәцсин болн Элст балһсна һардврин нилчәр белгүд хулдҗ авгдв.
Элстихн ирлцңгү керг-үүлдврт шунмһаһар орлцв, кесгнь өрк-бүләрн чигн энүнд орлцснь темдгтә болв. Элст балһсна Хургин депутат, цергә шишлң керг-үүлдврин ветеран Чумуда Николай эн керг-үүлдврин бүрдәһәчин негнь болв.
Нарн өдрин арвн часла лотерей эклв. Кесг билет авсн улс хойр белг шүүҗ авснь бас олыг байрлулв. Керг-үүлдврин йовудт 34 үнтә белг шүүгдв.
Лотерейин хамгин үнтә белг «Нива» тамһта цаһан өңгтә маши Элст балһснд бәәдг Муузран Санҗ шүүҗ авв. Энүнә келсәр, керг-үүлдврт эн шунмһаһар орлцҗ, арвн зурһан мишг хот-бог цуглулсн болв. Лотерейд маши шүүҗ авхв гиҗ санҗасн уга биләв, эндр күртл нанд эврә көлгн уга бәәсмн, ода болхла «Нива» маши залҗ гертән күрнәв. Иим чинртә кергт орлцсндан теңкән уга байрта бәәнәв, дорас өсч йовдг баһчудт эн керг үлгүр болҗ, эврә балһсан, төрскн һазран цеврдүлхин тускар бичә марттн, – гиҗ Санҗ байрарн хувалцв.
ОЛЬДАН Цаһан