Хальмгин эдл-ахус өөдәнәр ачлгдв

Шидр Дагестан Республикин Каспийск балһснд Анжи-Арена төвд һурвн өдртән тохма хөөдин болн ямадын Цугәрәсән XXV һәәхүл болв. Тенд орн-нутгин 12 регионас 60 һар нүүрлгч эдл-аху орлцв. Дөчн һар хөөнә болн ямана тохм тенд үзүлгдв.

Түрүн өдр керг-үүлдвриг Дагестан Республикин Толһач Сергей Меликов секв. Олн гиичнрән тосад, Сергей Алимович Әрәсән селәнә эдл-ахун Министерствд, хөд өсклһнә келн-улсин ниицәнд, чинртә һәәхүл бүрдәлһнд орлцсн фермермүдт ханлтан өргв.
Тер мет Әрәсән селәнә эдл-ахун болн хулд-гүүлгәнә министрин дарук Максим Боровой керг-үүлдврт орлцад, орн-нутгин малчнрин болн ирлцңгү көдләчнрин тәвцинь өөдәнәр үнлв.
Һурвн өдрин туршарт һәәхүлд олн-әмтн ирҗ, орн-нутгт өскчәдг олн зүсн тохма хөд болн ямад үзв. Тер мет малчнр дамшлтарн хувалцв, номтнр болхла, мал өсклһнә халхар шин эв-арһсин тускар бас цәәлһҗ келв.
Терүнәс нань һәәхүлин йовудт кесг харһлтс болн «төгрг ширән» сүүрмүд бүрдәгдв, хөөнә ноосар болн ямана булар кеҗ һарһсн хувцн бас үзүлгдв. Олн регионмудас ирсн сойлын коллективс билг-эрдмәрн байрлулв.
Хальмг Таңһчин делегациг селәнә эдл-ахун министрин үүл дааҗадг Гаван Тимур һардв. Мана таңһчин нүүрлгч эдл-ахус һәәхүлд орлцад, грозненск, сарпулин, сарпан, хар һазра меринос болн талдан тохма хөөдән һәәхүлд авч одв. Нег һазра мана арһлачнр кеҗ һарһдг селәнә эдл-ууш гиичнрт бас үзүлгдв.
Һәәхүлин һурвдгч өдртнь ашнь диглгдв. Онц темдглхд, нег һазра мана фермермүд ик күцәмҗ бәрҗ хәрҗ ирв. Цугәрәсән һәәхүлин ашар Хальмг Таңһч хойрдгч орм эзлв. Ут тоодан 18 медаль шүүҗ авв. Тер дунд 13 алтн, 4 цаһан мөңгн болн 1 күрл медальмүдәр ачлгдв. «Первомайский», «Черноземельский», «Сарпа», «Агрофирма Пик плюс», «Баска», «Улан хөөч», «Кировский», «28-ч Әәрмин нертә», Ю.Гагаринә нертә эдл-ахус ончрад, кесг ачлвр шүүҗ авснь темдгтә болв.
Һәәхүлин йовудт «Улан хөөч» тохма хөд асрҗадг эдл-аху онц темдглгдәд, сән чинртә хөөнә мах кеҗ һарһдг төләдән һәәхүлин өөдән темдгәр ачлгдв. Максим Боровой Гаван Тимурла хамдан хальмг тохма малыг хәләҗ үнлв. Хальмгуд ик кезәнәс авн малын ард йовдг улс болсн төләдән эн халхар ик күцәмҗ бәрҗ йовснь темдгтә гиҗ Максим Владимирович келв.
–Давсн һәәхүлд таңһчин эдл-аху болһн яһҗ көдлҗәхән иткүлв. Эн туст өдр-сө уга фермермүд көлсән һарһад, седклән тәвҗ көдлҗәхинь темдглх кергтә. Нег һазра фермермүд шаңһа дем авна. Тер мет селәнә эдл-ахун халхиг, нег үлү мал өсклһнә кергиг Хальмгин Толһач Хаска Бату онц кевәр бүрткнә, – гиҗ Тимур Сергеевич келв.
КАРСАНА Евгения