Балһсдт сән кец-таал тогтахар

Шидр Хальмгин Толһач Хаска Батун һардврт «Балһснд сән кец-таал тогталһн» төсв күцәлһнә ведомственн хоорндк таңһчин комиссин селвлцән болв. Таңһчин залврин ахлачин дарук Александр Мишаков, федеральн ах инспектор Александр Беляев, Лаганя болн Городовиковск райодын толһачнр Коган Юрий болн Абушинә Валерий, Элст балһсна һардврин ахлач Лиҗикә Алдр, министерствсин болн ведомствсин элчнр терүнд орлцв.Һаха сард мана таңһчд шар шаҗна нарт-делкән III чуулһн белдәд, Элстд болн таңһчин райодт сән кец-таал тогтагдҗана. Эн туст Элстин, Лаганя болн Городовиковск райодын һардвр ирлцңгү төсвсин тускар селвлцәнә йовудт цәәлһҗ келв.
Элст балһснд Колонский нертә боодгиг цеврләд, амрлһна орм кехәр зуралгдҗана. Тер мет Лагань болн Городовиковск балһсдт шар шаҗна хойр парк тосхгдхмн.
Колонский боодгин көвәд амрлһна талвң бүрдәгдхмн. Тенд спортын болн бичкдүдин төлә кесг талвңгуд тосхгдхмн, арһлачнр эврәннь эд-тавран бас хулдҗ чадхмн. Темдглхәс, цуг тоот шар шаҗнла ирлцүлҗ кегдхмн. Лагань болн Городовиковск балһсдт шар шаҗна паркуд тосхгдад, тенд бас нег һазра улсин болн гиичнрин төлә амрлһна шин ормс бүрдәхәр зуралҗана.
Тодлхас, 2020 җиләс авн мана таңһч орн-нутгин баһ балһсдт болн тууҗлгч селәдт сән кец-таал тогталһна төсвст орлцҗана. Городовиковск балһснд В.И.Ленинә нертә талвң болн «Башантан яарм», Лаганьд болхла «Көк теңгсин айсмуд» парк эн марһана ашар күцәгдәд тосхгдв.
– Цуг төсвсиг дәкнәс шинҗләд, хәләһәд, немх юмн бәәхлә, ахр цагин болзгт сольвр орулад, энүг күцәх кергтә. Тер мет шиидвр болһниг Хальмгин Шаҗн Лам Тензин Чойдакла эрк биш батлх кергтә, – гиҗ Хаска Бату ирлцңгү мергҗлтнрт даалһв.

КАРСАНА Евгения