Көдлмш олҗ авхар

«Одахн «Элст ГорТранс» бүрдәцд көдлҗәдг улст җалвинь икдүлснә тускар таңһчин барин һарцст умшлав. Би олн җилдән җолачар көдлләв, зуг ода көдлмш уга бәәнәв. Тиигәрән көдлмшт орхар седләв, тегәд эн туст цәәлһвр авхар седләв», – гиҗ Троицкое селәнд бәәдг Настан Михаил соньмсчана.

Эн сурврт «Элст ГорТранс» МАУ-н һардач Сасыка Александр хәрү өгв:
– Сүл җилмүдт Элст балһснд көлг йовлһна диг-дараг диглхин төлә өргн көдлмш кегдв. Җил хооран Хальмгин Толһач Хаска Батун нилчәр СИМАЗ тамһта 20 һар автобус хулдҗ авгдла, тер мет мана балһснд өдгә цагин некврлә ирлцдг зогсалмуд углҗ тәвгдв. Темдглхд, җил хооран Элст балһсна һардврин дөңгәр кадрмудын төр хаһлхин төлә бүрдәцд көдлхәр ирсн улсиг урмдулҗ җалвинь 150 процентд икдүлвидн. Көлг залдг болн энүг ясч чаддг зөвтә бәрмт цаасн бәәхлә мадн тал ирҗ болхмн. Терүнәс нань олн-әмтиг зөөдг зөв уга болхла, Хальмгин ДОСААФ-д ирлцңгү сурһуль сурад, кергтә темдг авч болҗана. Мана бүрдәцд көдлхәр седҗәдг җолачнриг, механикүдиг болн эрдмчнриг күләҗәнәвидн», – гиҗ Александр Викторович цәәлһв.