Кесг орн-нутгин номтнриг хамцулад

Хальмг ик сурһулин дацңгудт өөнин кесг керг-үүлдвр болв. Одахн залврин болн зөвин дацңгин төгсәсн улс багшнрла харһҗ оютнрин цаган тодлв. Ода дацңгин бакалавриатд, магистратурт болн аспирантурт кесг оютнр сурна, тер тоод холас сурдг әңг бәәнә. Багшнр эврә мергҗлтән докторантурт өөдлүлнә.

Дацңла хамдан шаңһа болн муниципальн залврин болн зөвин тиңкм 15 җилә өөнән темдглв. Хальмг вузин ик гисн тиңкмнь эн болҗана. Хальмг Таңһчин экономикин делгрлтин кев-янз тогталһнд эднә багшнр бас орлцв. Эндр таңһчин делгрлтин төлә күцәҗәдг кесг төсвд тиңкмин шинҗләчнр бас орлцҗана гиҗ Хальмг ик сурһулин болн тиңкмин өөнд нерәдсн байрин хургт нүр үгдән дацңгин һардач Виктория Ромадикова келв.
- Мана билгтә төгсәһәчнр гүн номин болн төсвин көдлмш күцәҗ туста кесг шинҗллт кев, ода чигн тиңкмин көдлмшт орлцҗана, - гиҗ Хальмг ик сурһулин һардачин дарук, тиңкмин профессор, экономикин номин доктор Мантан Эльза темдглв. - Бидн Москван болн Санкт-Петербургин, тер мет ЮФО-н кесг вузмудла нөкцлтҗәнәвидн, тер тоод Әәдрхнә, Аһшин болн Өмн үзгин ик сурһульмудла хамцу кесг төсв күцәнәвидн. Тер мет таңһчин мергҗлтнр мана тиңкмин болн дацңгин ул деер немр эрдм дасч авна. Экономикин болн хулд-гүүлгәнә таңһчин министерствин ул деер мана тиңкмин талвң үүлдҗәнә, түүнә ул деер таңһчин делгрлтин кесг төсвс болн көтлвр күцәгднә. Тер ик шинҗллтин болн нөкцлтин үүлдвр күцәсндән «Әрәсән алтн тиңкм» гидг дипломиг мана шаңһа болн муниципальн залврин болн зөвин тиңкм 15 җилин өөнән тосч зүүв,- гиҗ Эльза Ивановна темдглв.
Тер мет тиңкмин болн дацңгин багшнрин нилчәр гүн медрл авад ода таңһчин кесг министерствс - ведомствст баһ биш төгсәһәчнр көдлҗәнә, таңһчин делгрлтд тәвцән орулҗ, залврин болн зөвин дацңла цааранднь нөкцлтҗ хамцу көдлмш күцәҗәнә, -гиҗ экономикин болн хулд-гүүлгәнә министрин дарук Көкән Санл келв. – Залврин болн зөвин дацңгин багшнр болн оютнр-шинҗләчнр болн волонтермуд болҗ Элстд шар шаҗна ик хург бүрдәлһнд тәвцән орулҗ, Әрәсән болн һазадын орна гиичнриг сәәнәр тосч теднд олн зүсн хургудт болн керг-үүлдврт орлцлхин төлә сән таал тогтав, - гиҗ Санл Николаевич темдглв.
Тер мет Хальмг ик сурһулин эн дацңгин төгсәһәч, баһчудын кергүдин Агентствин һардач Камиль Маркеев оютна цаган тодлад, эднд дацңгин багшнр өдгә цагин бат медрл өгв, түүнә ашт эдн кесг эрдмәр көдләд, олн зүсн шинҗллтд орлцад, сән дамшлт хоршав гиҗ тодлв.
Тиңкмин магистрантнрин тоод таңһчин футболын федерацин президент, Элст балһсна Хургин депутат Хаска Аюка йовна. «Хальмг ик сурһулин багшнриг болн оютнриг өөнлә йөрәҗәнәв. Энд би залврин кергиг дасч авлав, 2019 җил магистратурт орлав, 2,5 җил сурлав, тер цаг медмҗән угаһар давв. Мана оютнрин баг ни-негн билә, зәрмнь эрдмән сольхар седҗәлә, тегәд магистратурт чигн орв.
Бидн дала шин медрл хальмг вузд хоршалавидн, хоорндан дамшлтарн хувалцҗ йовлавидн. Тиигхд әәмшгтә гемин таалд бидн сурсн бийнь, цугтан шүүврән өгәд дипломин көдлмшән харславидн. Багин оютнрла би ода чигн залһлда бәрнәв, эдн цааранднь мергҗлтән өөдлүлҗ шин эрдмәрн сәәнәр көдлҗәнә. Мана хальмг вуз иргчдән чигн делгрҗ, шин эрдмәр оютнриг сурһҗ, эрдмән делгрүлҗ йовтха», - гиҗ Аюка Сергеевич йөрәв.
Тер мет таңһчин эрүл-менд харлһна көдләчнрин профсоюзин ахлач Манҗикә Евгения залврин дацңгиг төгсәһәд, хойрдгч шин эрдм дасч авла. «Эрдмәрн би эмч күмб. Болв профсоюзин салврт ирхлә нанд залврин, зөв-йосна медрл кергтә болҗахинь медүв. Тегәд шаңһа болн муниципальн залврин эрдмиг дасхар седүв. Энд дассн юристын медрл әмтнә зөв харсхин төлә ик дөңгән күргҗәнә. Тиңкмин болн дацңгин коллективд, мана күндтә багшнрт ик күцәмҗ дурдҗанав»,- гиҗ Евгения Николаевна тоолврарн хувалцв.
Хальмг ик сурһулин ончта өөнд нерәдгдсн байрин керг-үүлдврмүд цаарандан давҗана.
ТҮРВӘН Һуна