Әрәсән-Китдын хоорндк хәрлцән

Хулһн сарин 23-ас авн 27 күртл Китдын Шеньян болн Пекин балһсдт хулд-гүүлгәнә-экономикин халхар нарт-делкән ик хург болв. Темдглхд, Әрәсән делегацин ханьд Хальмг Таңһчин экономикин болн хулд-гүүлгәнә министрин негдгч дарук Ганҗигән Наталья, Сарпан болн Баһ Дөрвдә райодын толһачнр Манҗин Басң болн Җекин Баатр орлцв.

Хургин йовудт олн зүсн талвңгуд көдлв. Хальмгин элчнр «Әрәсән-китдын инвестицин делгрлт болн хулд-гүүлгәнә нөкцлт» гидг селвлцәнд орлцсн болдг. Тер мет то-дигин делгрлтин, коммерцин халхар болн Китдт кеҗ һарһдг кергсл хулдҗ авлһна төрәр күүндврмүд бас болв.
Энүнә ашар хойр орн-нутгин хоорнд, нег үлү мана таңһчла селәнә эдл-ахун халхар нөкцлт хәләгдв. Мах болн буудя эд-бод келһнә, Сарпан районд болхла эмнлһнә урһмл урһаҗ авлһна төрәр үгцсн билә. Әрәсән болн Китдын хоорндк хәрлцән цаарандан делгрәд бәәхмн гиҗ нәәлгднә.