Соньн зәңгәр байрлулхар зүткнә

Эндр таңһчин барин көдләчнр сән Өдрән темдглҗәнә. 1917 җилд «Өөрдин зәңг» нертә газетин түрүн тойг барас һарсмн. Мел тер цагас авн хальмг барин тууҗ эклцән авна.

Хальмг номтнр болн гегәрүлгчнр Очра Номт Боован Бадм хойр хальмгудыг гегәрүлхин болн бичлһнд орулхин төлә газет һарһдг седвәр татсн болна. «Улан Хальмг», «Таңһчин зәңг» гиҗ газет кесг дәкҗ нерән сольҗ, 1943 җил күртл һардг билә. 1957 җилд хальмгуд Сиврәс төрскн теегтән хәрҗ ирәд, шинәс һардг газетиг «Хальмг үнн» гиҗ нерәддг болв. Тер цагас авн эндр күртл газет умшачнран соньн, өвәрц зәңгслә таньлдулна.
«Хальмг үннә» болн мана таңһчин тууҗ батар залһлдата. Арвн һурвн җилдән һазр-уснасн салад, хол Сиврт тууврт бәәсн хальмгуд төрскн нутган шинәс босххар шунв. Олн җилин туршарт кесг үйин седкүлчнр мана таңһчин тууҗин, сойлын, селәнә эдл-ахун, сурһуль-эрдмин, экономикин делгрлтин болн талдан чинртә төрмүдин тускар зәңглҗ йовсмн.
Дорҗин Басң, Инҗин Лиҗ, Сән-Белгин Хаср, Балакан Алексей, Бадм-Һәрән Эрднь-Һәрә, Ченкалин Борис, Җимбин Андрей, Нуура Владимир болн талдан нертә улс газетд көдлҗ йовла.
Эндр болхла ах үйин седкүлчнрин кергиг бидн цааранднь давулҗ йовнавидн. Өдгә цагт мана таңһчд «Хальмг үнн» бәәтхә, «Теегин герл», «Байр», «Байрта», «Парламентский вестник», «Элистинская панорама» нертә седкүлмүд болн газетмүд барас һарна. Терүнәс нань өдгә цагин некврлә ирлцҗәдг «Теегин зәңг» («Степные вести») интернет-газет дәкәд таңһчин райодын газетмүд бас барлгддгнь темдгтә.
Спортсменмүдин, малчнрин, багшнрин, һардачнрин болн талдан улсин күцәмҗин тускар таңһчин һарцст даңгин бичгднә. Тер мет мана умшачнр болхла редакцд җиңнүләд, бичгүдән чигн илгәһәд, соньмсулҗадг төрмүдәр цәәлһвр өгхиг сурна.
Өдгә цагт седкүлчнрин дамшлт өөдлүлхин төлә олн зүсн керг-үүлдврмүд бүрдәгднә. Терүнәс нань мана седкүлчнр таңһчин болн Цугәрәсән барин марһаст орлцад ончрна гиҗ бас темдглх кергтә.
Өдр болһн оньган өгч, орн-нутгт, нег үлү төрскн таңһчд ямаран йовдлмуд учрсинь умшачнртан медүлхәр седкүлчнр зүткнә. Барин ветеранмудас болн ах үүрмүдәс үлгүр авч, көдлмшән цаарандан даавртаһар күцәһәд, соньн зәңгс олҗ авхар даңгин шуннавидн. Сүл цагт баһчуд хальмг келән медх, дасх седклтә бәәхнь бахмҗта. Тегәд хальмг келәр һардг мана газетиг нег һазра улс, нег үлү баһчуд бичүлҗ авад умшад, мана кергиг дөңнҗ йовхд иткҗәнәвидн.
Күндтә мана таңһчин барин ветеранмуд, өдгә цагин көдләчнр, сән Өдрлә цуг тадниг йөрәҗәнәвидн, кесн көдлмштн өмәрән йовҗ, соньн зәңгәрн нег һазра улсан байрлулҗ, умшачнрин то икдүлҗ, седвәртәһәр, үүдәгч кевәр көдлхитн дурдҗанавидн.
КАРСАНА Евгения