Эңкр һазртан нерәдәд...

Күн болһна җирһлин болзг төгсхлә, арднь кеҗ-күцәҗ йовсн тоотнь эрк биш үлднә. Тернь юн болҗахв? Җирһлин туршарт хоршасн юмн...

Элст балһсна 4-ч тойгта дунд сурһульд хальмг келнә багшар көдлсн Әрәсән сурһуль-эрдмин күндтә көдләч, Хальмг Таңһчин ачта багш Нимән Тамара хулһн сарла сәәһән хәәһәд хәрҗ одв. Эн җилин хаврар далн насни өөнән тосад-темдгләд, бийинь тускар иим үгмүд бичсмн:

«Дааврта өөн» (шүлгин тасрха)
Далн насндан күрчәнәв.
Далваһан деләд нисчәнәв.
Далн җилин туршарт
Дала сән-му чигн үзгдв.
Тер бийнь байртаһар
Таалмҗта Өөнән тосчанав...
Тегәдчн хөвтәд бийән тоолад,
Тегшгәр цуһараһитн күндлнәв.

Нимән Тамара 1976 җилд Элстин багшнрин училищ төгсәв. Хату цаасан авад, хойр җилдән балһсна 2-ч тойгта сурһульд күч-көлснә хаалһан эклсн болдг. Хөөннь Хальмг ик сурһуль төгсәһәд, арвн долан җилдән Яшкулин районд багшар, һардачин дарукар болн һардачар чигн көдләд, ик дамшлт хоршав. Терүнә дару арвн җилдән Элстин 25-ч тойгта сурһульд көдләд, 2010-ч җиләс авн 4-ч тойгта дунд сурһульд көдлсмн. Дөчн һар җилдән Нимән Тамара баахн багшнрла дамшлтарн хувалцҗ, яһҗ кичәлмүд давулхиг, ямр немр эв-арһ олзлхиг зааҗ йовла. Кесг сурһульчнрнь багшиннь үлгүрәр хальмг келнә мергҗлиг шүүһәд, эндр таңһчин сурһульмудт көдлҗәнә. Тер мет сурһульчнрнь балһсна болн таңһчин марһаст орлцад, даңгин нүүрлгч ормс эзлҗ йовна.
Тамара Манджиевна ик дамшлтта багш болсн деерән терүнәс нань билгтә күн билә... Цаһан санань, әрүн седклнь, чееҗднь урсад бәәсн ухан-тоолврнь элгн-садндан, хамдан көдлсн багшнртан болн ик сурһульд сурч йовсн үүрмүдтән нерәдсн сәәхн шүлгүд, йөрәлмүд энүнә халуч зүркнәс һарсн мөн.

Хаврин теегтән һарад,
Хаалһ хәләһәд зогсв...
Хамг сән тоот
Хол цагас тодлгдв.
Теегин цевр аһар,
Торһа шовуна җирһллһн
Талын олн тоот
Тагчгар седклм өврәв...
...
Мөрн сарла теегм сәәхрнә.
Мандлҗ нарн әмт байрлулна.
Магталта үгмүд чееҗ дүүргнә.
Маарул бамб цецгүд урһна.
Мал төлән дахулҗ идшлнә.
Маш сәәхн җирһл болна.
Маңһдурк өдр цуг әмтнә
Маасхлзсн, байрта инәд
белглнә.
Әмтин сәәхн апрель ирв!
Әмдрәд, йиртмҗ нүд байрлулх.
Әәмшгтә цаг, му гем
Әмнь тасрад, уга болх.
...

Төрскн һазртан дуртав
Теврҗ ханшго орчлң!
Энүг эс хадһлхла,
Энтн баргдшго зовлң.
Хальмгин сувсн – «Җаңһр».
Теегин кеермҗ – гөрәсн.
Хотл балһсн – Элст
Тедниг хадһлх зөвтәт.
Ээҗм нанд келлә:
– Эврә келән дас.
Эк-эцкән тевчҗ,
Эңкр йиртмҗән хар!
Терүнәс нааран би
Теегтән дуран өгләв.
Эңкр эврә һазртан
Ээҗләһән әдл дуртав!
Шүлгүдән Төрскндән, буурл теегтән, Хальмгин бичәчнрт болн нертә үүлдәчнрт нерәдсн билә. Көглтин Давад, Бембин Тимофейд, Җимбин Андрейд, Манҗин Аркадьд, Гиндян Баатрт болн талдан үүлдәчнрт нерәдсмн. Шүлгүдәр дамҗад, Нимән Тамара төрскн келндән, өөрхн улстан дуран медүләд йовла.
Энүнә сәәхн дүрнь мана зүркнд мөңкинд үлдв… Сәәһән хәәсн мана Тамара Манджиевна үнн һазртан күрч, ардан тачал уга йовтха, сәәни орндан төртхә...
МАНҖИН Галина,
Элстин багшнрин училищд
хамдан сурч йовсн үр