«Сәәхн дүрнь - мана зүркнд»

Шидр Элст балһсна 4-ч тойгта дунд сурһульд Хальмг Таңһчин ачта багш Нимән Тамаран санлд нерәдсн харһлт болв. Дөчн йисн хонг хооран өрүн эрт көдлмштән адһҗ йовад, Тамара Манджиевна хаалһд зеткртә йовдлла харһад, әмнәсн хаһцв. Сурһуль-эрдмин халхд тәвн җилдән үнн-чик седклтәһәр көдләд, дорас өсч йовдг бичкдүдт төрскн кел, өвкнриннь сойл, авъяс зааҗ йовсн багш энүнлә хамдан көдлҗ йовсн үүрмүдиннь болн сурһульчнриннь санлд мөңкинд үлдв.

Харһлтыг дунд сурһулин һардач Очр-Һәрән Елена нүр үгәр секәд, Тамара Манджиевнаг бүләнәр тодлҗ, төрскнч седклтә, хальмг келндән хару, цаһан саната байн дамшлтта багшиг ик-бичкн уга күндлҗ тевчдг бәәсиг темдглв. Сурһульчнр багшдан йир дурта бәәсмн, энүнә һардврт балһсна болн таңһчин марһаст ик күцәмҗ бәрдг билә. Нимән Тамара сурһульчнртаһан хамдан хальмг улсин Зул, Цаһан сар байрин өдрмүдт сергмҗтә керг-үүлдврмүд давулдг бәәсмн, җил болһн хальмг шүлгләнә Өдрт нерәдгдсн марһанд орлцдмн. Баахн багшнрт Тамара Манджиевна ах үүрнь болҗ, күч-көлснә хаалһднь итклтә түшг болҗ, мергҗлтән өөдлүлхднь дөң-тусан күргдгиг Елена Борисовна тодлҗ келв.
Хамдан Х.Кануковин нертә педагогическ училищд болн Хальмг ик сурһульд сурч йовсн Джоджинә Светлана, Җимбин Светлана болн Харитона Людмила Тамара Манджиевнаг баһ цагасн авн таньҗ йовснаннь тускар келәд, тәвн һар җилин эргцд сән үр-иньгүд болҗ, байр-зовлңган әдл хувалцсиг темдглв. Баһ цагасн авн нег-негән сәәнәр медҗ йовсн төләдән эдн Тамара Манджиевна ямаран багш, эк, үр бәәсиг сәәнәр меднә, тегәд зеткр учрснь эднд ик зовлң учрав. «Оютн бәәсн цагт мадниг Октябрьск районд одад мәңгрс хуралһнд йовулсмн, тенд Нимән Тамара, Бадмин Галина, Һәрән Любовь болн би үүрләд, хөөннь сурһуль сурчасн цагт хамдан нег өрәд бәәдг биләвидн. Тер цагас авн бидн үүрлҗ йовнавидн. Мана Тамара сәәһән хәәснь зүркнә өвдкүр болҗ үлдв», – гиҗ Людмила Гучуновна хувалцв. Хамдан сурһуль сурсн болн хөөннь нег сурһульд көдлсн багшнр Джоджинә Светлана болн Җимбин Светлана үүриннь тускар бүләнәр тодлҗ, өр-өвч седклинь, делкә мини гисн санаһинь темдглҗ, сурһульчнртан ямаран дурта бәәсинь темдглв. Дәкәд Тамара Манджиевна өрүн эрт босад, боорцг, әмтәхн кегдлмүд болһад, сурһульд авч ирҗ цугтаһинь тоодг бәәсиг тодлв.
Нимән Тамара хальмг келәр шүлгүд үүдәдг бәәсмн, тегәд 2021 җилд түрүн хураңһунь барас һарсмн. Харһлтын йовудт Тамара Манджиевна сурһҗ йовсн классмудын сурһульчнр багшиннь шүлгүд чееҗәр айслулҗ умшв, күүкд-көвүдин эк-эцкнр бүләнәр тодлҗ өрк-бүлиннь зовлң хувалцҗ һундл төрв. Хальмг келнә багшнр Настан Клавдия, Бимбрә Светлана, Хайко Кермн ах үүрән тодлҗ бас шүлгүд айлулҗ умшв. Эн җилин хаврар Тамара Манджиевна 70 җилин өөнән темдглсн билә, Кермн Эльдяевна ах үүртән шүлг нерәдсн бәәҗ, тегәд терүг барлад, Сергей көвүнднь белглв.
Харһлтд «Калмыкия» таңһчин зәңгллһнә бүрдәцин һардач Марила Хоңһр болн «Хальмг үнн» газетин редакцин седкүлч Дооҗан Наталья орлцв. Тамара Манджиевна мана газетлә олн җилдән бат залһлда бәрҗ, шунмһа түүрвәч болҗ сурһульчнриннь күцәмҗин, Сиврин болн дәәнә туск статьяс барлдг бәәсмн. Таңһчд учрсн темдгтә йовдлмудын, ачта нег һазра улсин тускар шүлг үүдәҗ, газетин халхст тернь барлгдхла йир байрлдг билә.
Эндр Тамара Манджиевна сәәһән хәәснә 49 хонг күцв. Үнн һазртан күрәд, ардан үлдсн өрк-бүлдән, хамдан көдлҗ йовсн үүрмүдтән болн сурһульчнртан кишгән үлдәҗ, сәәни орнд төртхә! Сәәхн дүрнь седклд төөнрҗ үлдтхә!
ДАВАН Наталья