Ветеранмудын төрмүд хәләгдв

Шидр Москва балһснд цергә шишлң керг-үүлдврин ветеранмудын бүрдәцин Әрәсән регионмудын әңгүдин гешүдин харһлт болв. Һурвн зун һар СВО-н ветеран керг-үүлдврт орлцв. Терүнә йовудт Әрәсән ветеранмудын хамгин ик ниицәсин тоод ордг бүрдәц һарчах җилин ашинь диглв.
2025 җилд СВО-н ветеранмудын бүрдәцин әңгүд орн-нутгин цуг регионмудт секгдәд көдлдг болв. Өдгә цагт бүрдәцин әңгүд Әрәсән муниципалитетмүдт чигн бас секгдҗәнә.
Тодлхас, җилин йовудт СВО-н ветеранмудын бүрдәцин харһлтс түрүләд орн-нутгин нәәмн дуһргт давулгдсн билә. Тер харһлтсин йовудт ветеранмуд зака күцәгч седвәр татад, дамшлтарн хувалцад, шин медрл авч, соньн төсвс бүрдәсмн.
Әрәсән Президентин һардврин, министерствсин болн ведомствсин, орн-нутгин Хүүвин, Федеральн Хургин Федерацин Хүүвин, «Төрскән харсачнр» саңгин, Төрскнәннь дәәчнрин өрк-бүлмүдин бүрдәцин болн олна бүрдәцсин элчнр ашглч керг-үүлдврт орлцсн болдг.
2025 җилиг ашлҗадг харһлтд орлцачнр СВО-н ветеранмудын бүрдәцин регионмудын хамгин сән дамшлтла таньлдв, тер мет әмнәсн хаһцсн дәәчнрин санлынь мөңкрүллһнә төр бас босхгдв. Терүнәс нань шаңһа кесг бүрдәцслә нөкцлтин бооцас батлхар зуралгдв.
Немхд, эн чинртә керг-үүлдврин йовудт СВО-н ветеранмудын бүрдәцин Хальмгин әңгин һардач Чумуда Николай цергә үүртәһән харһв. Түрүн авгтан эдн нег-негән таньсн уга. 2022 җилд нег догшн дәәлдәнә йовудт эн күн күндәр шавтсн билә, өөрнь Николай бәәһәд, нөкд болад, әминь аврсн билә. Ода эвин таалд харһсндан эдн байрлад, үстә нүдәрн үзлцәд, олна кергин төлә тәвцән цааранднь орулҗана.
– Төрскән харсачин җил төгсчәнә, тер бийнь мана кех-күцәх тоотнь дала гиҗ келх кергтә. Төрскн һазран харсхин төлә нег дәкҗ андһаран өгсн күн җирһлиннь туршарт сүл әмсхл күртлән эн үгмүдән мартх зөв уга, – гиҗ Чумуда Николай ашлв.
КАРСАНА Евгения