Насан авдг өдр

16-12-2025, 11:49 | ---

Хальмгуд кезәнәс авн темдглҗ йовдг Зулын байриг таңһчд күн болһн седкләрн үүмҗ тосна. Кен-негнәннь җирһлд олн тоотарн дүүрң җил иигәд төгсхдән өөрдәд ирв. Давсн җилиг харвад хәләхлә, тернь бүклдән Хальмг Таңһчд йир евәлтә җил болв.

Байр үүдәсн күцәмҗнь баһ биш болв. Бурхн Багшин номд шүтдг хальмгудт эн җил кесг холванд евәлтә болв гиҗ келхлә үнн болхмн. Мана таңһчд Бурхн Багшин номд шүтдг шаҗна үүлдәчнрин һурвдгч нарт-делкән ик цуглран болв. Нарта орчлңд бәәдг һучн һар келн-улсин элчнр Элстд цуглрҗ ирәд, ирх шин миңһн җилд бурхн -щаҗна ном ямаран делгрлт авхин тускар тохнята күүндвр кесмн. Бурхн Багшин номиг делгрүллһнә, шаҗна хувргуд белдлһнә төрмүдәс нань эн цуглранд йосна, олна үүлдврин халхд, экономикд, бизнест, эрүл-менд харлһнд, гүн номиг делгрүллһнд болн җирһлин нань чигн халхд күргҗәдг нилчин тускар олна үүлдәчнр, номтнр, сойлын көдләчнр ухан-тоолврарн хувалцҗ, иргч үүлдврин хаалһиг темдглҗ авснь чинртә болв.
Бурхн-шаҗнд шүтдг әмтнд седклин герл өгсн дәкн нег ончта йовдл учрв. Бурхн Багшин әрүн тоотыг Энткгин һазрас авч ирҗ, миңһәд күн зальврх таал учрв. Бурхн Багшан үзснлә әдл байрлҗ зальврсн әмтн төвкнсн седклтәһәр Мөрн җилдән орҗана. Әмтнә җирһлд эвин бәәдл тогтх гисн ухан эднә седклд һол орм эзлҗәнә.
Хальмгуд кезәнәс авн Зулыг нарта орчлң үүдсн цаг гиҗ темдглнә. Ончта эн өдриг темдглдг ор һанцхн келн-улс болдмн. Бурхн-шаҗна номин гелуг номин халхин эклц тәвсн Зунква гегәниг эн өдрт хальмгуд тевчҗ тодлна. Өвкнрин цагас авн улсин җирһлд батрсн байрин эн өдрт хальмгуд дегц насан авна. Эврә насн деерән дәкн нег җил немәд, әмтн байран кенә.
Эн нарта орчлң деер альд йовдг болв чигн өөрднрин тохмиг цааранднь делгрүлҗ йовдг цуг хальмгуд насан авчах өдр цугтад өлзәтә болтха!
УШКАНА Сувсн

Видео