Төрскән харсачнрин нернь туурв

Сегодня, 14:48 | Общество, Таңһчин зәңгс, Зіњг

Җил болһн Әрәсәд лу сарин 23-д Төрскән харсачин өдр темдглнә. Тиим кевәр бидн мана орн-нутгин цергә тууҗинь болн Әрәсән төвкнүн болн әәмшг уга бәәдлиг харҗадг цергчнрин кергинь күндлҗ бахтнавидн. Давсн җилд бидн Төрскән харсгч Алдр дәәнд диилвр бәрснә 80 җилин ончта өөн темдглләвидн. Тер дәәнд Советин Союз 27 сай иргән геесмн, тер тоод кесг сай салдс болн офицер аврлт уга дәәлдәнд әмнәсн хаһцла.
Улан Әәрмин ханьд 110-ч Хальмг онц дивизь залу-зөргән үзүлҗ дәәлдҗ йовла. Тер тоод Ростовин мүҗин Пухляковск күүтрин эргнд болсн дәәлдәнд зөргтә хальмг дәәч Делгә Эрднь баатр йовдл һарһҗ хортна дәврлһиг зогсаҗ, хооран цухрлго өмәрән зөрҗ әмнәсн хаһцла. Хальмг теегин хәәртә үрн Советин Союзин Баатрин өөдән нер зүүснь нег һазра улсин төлә бахмҗ үүдәлә. Талдан фронтс, туршулачнрин багмудт хальмг дәәчнр залу-зөргәрн йилһрҗ өөдәнәр ачлгдад, бас нерән туурулсн болдг.
1944 җилд Дорд үзгин Пруссь орн-нутгин меҗә һатлҗ давсн туурмҗта генерал Басан Городовиков бас Советин Союзин Баатрин өөдән нер зүүсмн, хөөннь кесг җилдән Хальмг Таңһчиг чадмгар һардҗ, экономикин бат ул тогтала. Широклагин болн тууврин күнд-күчр таалыг давҗ һарсн хальмг салдсмуд төрскн таңһчин босхмҗд шунмһа кевәр орлцсинь кезәд чигн мартгдшго.
Теднә ачнр-җичнр Афганистанд болн Сирийд, ода цергә шишлң керг-үүлдврт әмән әрвллго дәәлдҗәнә. Әрәсән Баатрин өөдән нерн Лаганя көвүн, зөрмг офицер Лиҗин Мингиянд зүүлһгдв. Терүнлә хамдан нег балһснд өсч-боссн Очр-Һәрән Нарн бас зөргтә цергә үүлдврәрн йилһрҗ, Әрәсән Баатрин нер зүүсмн. Әрәсән Президент Владимир Путин хальмг баатрт Москвад өөдән ачлвринь бәрүлҗ өгсмн. Дорас өсҗәдг үйнрин төлә энтн сән үлгүр болҗахнь лавта.
Ода чигн баһ наста хальмг баатрмуд цергә даалһвран йилһән сәәнәр күцәҗ, эврә һазр-усна , отг-әәмгин нер туурулҗ йовна. Әрәсән болн Хальмг Таңһчин үлмә уга бәәдлин төлә дәәлдәд әмнәсн хаһцсн баатрмудыг бидн мартшговидн, теднә нерд мана санлд үлдх. Теднәс үлгүр авч уйн наста баатрмуд өсч-босчана, кергтә болхла эдн чигн Төрскән харсхд белн болх.Зуг тиим дәәлдән дәкҗ бичә учртха, цергә шишлң керг-үүлдврт мана дәәчнр эрк биш диилвр бәрхнь лавта болхмн.
Әрәсән харслтын күчн җил ирвәс өсәд-өргҗәд йовна, терүнә ашт авиациг, флотыг, әәрмин талдан чигн әңгүдиг хамгин шин, күчтә зер-зевәр теткҗәнә. Талдан келн-улсин цергчнрлә хамдан дәәлдҗәдг хальмг көвүд Төрскән харсад, эвин бәәдл тогтахар зүткҗәнә. Лу сарин 23-д орн-нутгт темдглх Төрскән харсачин Өдрлә цергә үүлдврин цуг ветеранмудыг, ода СВО-д орлцҗадг мана дәәчнриг йөрәҗ, хөв-кишгән эдлҗ, амулң-менд бәәтн, хортыг күүчҗ, туурмҗта кергән күцәҗ йовтн гиҗ дурдҗанавидн.

ТҮРВӘН Һуна

Видео