Өсәд-боссн һазран делгрүлхин төлә

Сегодня, 12:09 | Общество, Таңһчин зәңгс, Зіњг

Күн болһнд өсәд-боссн һазрнь җирһлиннь туршарт өөрхн болҗ, чидл-омг өгдг орм болна. Зәрм улс төрскн отг-әәмгтән тааста эрдмәрн көдләд, өрк-бүлән өндәлһәд бәәнә. Приютна района Первомайское селәнд өсәд-боссн Санҗин Владимир тиим улсин негнь гиҗ келҗ болҗана. Эн селәнә дунд сурһуль төгсәснә хөөн Хальмг ик сурһульд эрдм дасад, төрскн һазртан күч-көлснә хаалһан эклсмн. Владимир Давеевич селәндән комсомолын болн профсоюзин бүрдәцс һардҗасмн, эдл-ахуд ах инженерәр көдлҗ йовсмн. Арвн тавн җил хооран нег һазра улс энүнд иткәд, селәнә муниципальн бүрдәцин толһачин үүл даалһв.
Владимир Давеевич эн җилмүдин эргцд үнн-чик седклтәһәр көдләд, селәнә делгрлтин төлә арһ-чидлән нөөлго көдлҗәнә. Селәнә бүрдәц шаңһа көтлврмүдт орлцҗ, әмтнә җирһлин таал ясруллһна, сән кец-таал тогталһна төрмүдиг арднь орҗ хаһлҗана. Тиигәд, селәнд «Эрүл-менд харлһн» гидг келн-улсин төсвин йовудт шин эмнлһн тосхгдв. Энд эрүл-менд харлһна көдләчнрин болн әмтнә төлә сән таал тогтагдв. Эмнлһ авхин төлә олн хора бәәнә, усн орулгдв, дулан, цевр-цер, сарул бәәрнд көдлхд чигн тааста гиҗ эрүл-менд харлһна көдләчнр темдглнә. 2019 җилд селәнд сойлын Гер эдлврт орв. Энд байрин керг-үүлдврмүд бүрдәгднә, дегтр умшхдан дурта улс нааран дару-дарунь ирнә. Бичкдүдин садт селәнә эдл-ахун дөңгәр бас ясврин көдлмш кегдҗ, усн орулгдв, дулаһар тетклһнә кергсл шинрүлгдв. Эн җил болхла селәнә дунд сурһульд бат ясвр эклхмн. Энд орань сольгдхмн, терз-үүдинь шинрүлхмн, өдгә цага кергсл углҗ тәвәд, сурһульчнрин болн багшнрин төлә өдгә цага некврлә ирлцдг таал тогтахмн.
- Мана селәнә әмтн эврәннь төрскн һазртан эңкр улс мөн. Бидн әмтнә седвәр дөңнлһнә көтлврт орлцад, 2024 җилд бичкдүд нааддг талвң тосхвидн. Эн кергт 1 сай 200 миңһн арслң һарһгдв. Нидн болхла Алдр Диилврин 80 җилин өөнд нерәдҗ, Төрскән харсгч Алдр дәәнд әмнәсн хаһцсн нег һазра улсин санлын бумбин (зургт) өөр-шидр һазриг кеерүллһнә төсв күцәһәд, 3 сай шаху арслң һарһвидн. Тер мөңгәр бумбиг ясад, Мөңк һал углҗ тәвсн биләвидн. Урднь Мөңк һал зуг Диилврин Өдрлә шатдг бәәсмн, ода болхла шишлң кергсл углҗ тәвгдснә дару өдрин дуусн шатдг болв. Эн җил бидн әмтнә седвәр дөңнлһнә көтлврт орлцхар эрлһән бас орулвидн. Мана селәнд Төрскән харсгч Алдр дәәнә цагт әмнәсн хаһцсн 9 салдсин үкәр бәәнә. Тенд бумбинь шинрүләд, эргндк һазринь ахулад, шам углҗ тәвәд, модд суулһад сән кец-таал тогтах зура бас бәәнә. Бәәрн әмтнә седвәрәр күцәгдҗәдг төсвс селәнә делгрлтд, дорас өсч йовдг баһ үйнрт төрскнч сурһмҗ өглһнд эрк биш туслҗана, - гиҗ Владимир Давеевич темдглв.
Первомайское селәнә муниципальн бүрдәц талдан чигн марһаст болн көтлврмүдт орлцҗ, ямр нег төсв күцәхәр шунна. 2018 җилд эдн социальн төсвсин марһанд орлцад, бичкдүд нааддг талвң тосхлһнд мөрә шүүҗ авсмн. 2023 җилд эдн «Лукойл» компаня марһанд орлцад, Төрскән харсгч Алдр дәәнд орлцсн нег һазра улсин санлын бумблв яслһнд 300 миңһн арслң шүүҗ авсн билә. Нидн селәнә дунд сурһулин улд спортын стадион бас тосхгдв, тенд күүкд волейбол, футбол наадна, цогц-махмудан батрулхин төлә шишлң кергсл тәвгдв.
Санҗин Владимирин келсәр, района һардвр, «Первомайский» ООО болн энд өсәд-боссн улс төрскн селәнә делгрлтд туслхар шунна. Нидн Приютна района һардврин болн фермермүдин дөңгәр селәнд түүмр унтралһна бүрдәц секгдв. МТМ-н хуучн бәәрнд ясврин сән көдлмш кеһәд, ус, газ, шам орулад, бийән уһадг хора секәд, амрлһна таал тогтаһад көдлмшч ормс бүрдәв. Района һардвр «ЗИЛ» тамһта маши йилһҗ өгв, эдн терүг ясч авв. Ода түүмр унтралһна бүрдәцд 11 күн көдләд, цаглань җалван авч өрк-бүлән теҗәнә. Келхд, хам-хоша бәәдг Ик Буурла Көвүд болн Зунда Толһа селәдәс залу улс бас энд көдлҗәнә. Эдн теегт түүмр учрсна цагт тер дарунь һарч йовна, гиҗ Владимир Давеевич эднә көдлмшиг үнлв. Нег һазра улсин сә хәәҗ, зуни сармудт һаң-халун болсн кемд түүмрәс саглуллһна төр хаһлгдснь энүнд ик бахмҗ үүдәнә.
Приютна района Первомайское селән Элст балһснас хол биш бәәнә. Энд бәәдг улс төрскн селәндән эзни хәләцтәһәр үүлднә. Санҗин Владимир болхла нег һазра улсиннь җирһлин таал ясрулҗ болн отг-әәмгиннь делгрлтин төлә дәкәд чигн олн җилдән күцәмҗтәһәр көдлҗ йовтха гиҗ дурдҗанавидн.
ДООҖАН Наталья

Видео