Таңһчин экономик делгрхин халхар

Сегодня, 11:34 | Общество, Таңһчин зәңгс, Зіњг

Шидр Хальмг Таңһчин ачта улсин Хүүвин гешүд Хальмг Таңһчин Улсин Хуралын (Парламентин) депутат, «Делгрлтин күчн» җисәнә һардач Михаил Богатовла харһв. Эн җил моһа сард «Негдсн Әрәсә» партин хургин йовудт таңһчин ачта улсин Хүүвин ахлач Пашнана Эрднь «Делгрлтин күчн» гидг промышленностиг делгрүллһиг дөңнҗәдг олна җисә бүрдәлһнә седвәр орулсн билә. Шин җисәг таңһчин Улсин Хуралын (Парламентин) депутат Михаил Богатов һардҗ чадхмн, гиҗ Эрднь Лиджиевич ухан-тоолврарн хувалцсн билә, таңһчин Толһач Хаска Бату эн седвәриг дөңнәд, шин җисәнә һардачиг үүлднь батлсмн.

Таңһчин ачта улсин Хүүвин ахлач Пашнана Эрднь харһлтыг секәд, Михаил Богатов шин җисә һардад, таңһчин цуг райодар йовад, бәәрн улсла харһад, экономик делгрүллһнә, селәнә эдл-ууш эд-бод келһнә, арһлачнриг дөңнлһнә төрмүдәр сүв-селвгүдинь медҗ авв гиҗ келв. Тер харһлтс туста болсиг Михаил Александрович темдгләд, район болһн эврәһәрн онц болдгиг заав. Тиигәд, Үстин районд әмтн теплицд олн зүсн темс урһалһна төр босхв. Энд темс урһаҗ олзта-орутаһар көдлхин төлә усн бәәнә. Электрокүчнә ормд газ олзлҗ дулаһар болн халун усар тетклһнә кергсл углҗ тәвснь орута болхмн гиҗ депутат тоолҗана. Городовиковск болн Яшалтан райодын әмтн үс эд-бод келһнә бүрдәц секхин туск ухан-тоолврарн хувалцв. Таңһчд мах, үс, заһс эд-бод кедг бүрдәцс эрк биш кергтә гиҗ селәнәхн чинртә төрмүд босхад, «Делгрлтин күчн» гидг җисән эн халхар туслх гиҗ ицҗәнә. Бидн эн төрмүдиг хаһлад, арһлачнриг болн селәнә эдл-ахусиг дөңнхвидн гиҗ Михаил Богатов темдглв. Мана таңһчд олзта-орутаһар үүлддг арһлачнр болн эдл-ахус бәәнә, эдн селәнә бәәдл-җирһлд шунмһаһар орлцҗ, социальн бүрдәцст демән күргҗ, бәәрн улсиг дөңннә. Лаганя района Красинский селәнд темс урһаҗ эд-бод келһнә, Җалһа селәнд боднцг урһалһна бүрдәцс секх зура бәәнә, төрскн һазртан олзта-орутаһар көдлх саната улсиг эрк биш дөңнх кергтә гиҗ эн келв.
Таңһчин ачта улсин Хүүвин гешүд Михаил Александровичд сурврмудан өгәд, шин җисәнә үүлдвр күцәмҗтә болхиг дурдв. Харһлтд таңһчин экономикин делгрлтд туслх төмр хаалһ тосхлһна, көдлмшч эрдмтә баһчудыг, бәәрн арһлачнрин седвәриг дөңнлһнә төрмүд босхгдв.
- Мана Хүүвин седвәрәр бүрдәгдсн җисәнә һардачд Михаил Богатов батлгдад, ахр цагин эргцд цуг райодт одад, әмтнлә харһҗ күүндв. Ода мана таңһчд эдл-ууш эд-бод келһиг делгрүлх кергтә. Бидн бийән теткҗ олзта-орутаһар үүлдх зөвтәвидн. Мана таңһчд селәнә эдл-аху сән йовудтаһар делгрҗәнә, җил болһн элвг урһц хураҗ авнавидн, сән төл авад малын то өсчәнә, тәрәнә эк чигн бидн эд-бод кедг болвидн, тегәд экономикән делгрүлх кергтә. Эндр болсн харһлтд бидн чинртә төрмүд босхад, туста күүндвр тогтаввидн. «Делгрлтин күчн» гидг җисән таңһчиг батрулҗ, әмтн төрскн һазртан бәәһәд көдлхд, шин бүрдәцс секлһнд туслх гиҗ ицҗәнәвидн. Михаил Богатов бийнь олн җилдән арһлач болҗ олзта-орутаһар болн күцәмҗтәһәр көдлҗәнә, энүнә дамшлт болн төрскнч седкл зуралсн тоотыг күцәхд эрк биш керглгдх, - гиҗ Пашнана Эрднь харһлтыг товчлҗ келв.

ДООҖАН Наталья

Видео