Баһчуд багшин эрдм шүүҗ автха гиһәд

Сегодня, 15:04 | Общество, Таңһчин зәңгс, Зіњг

Ода таңһчин сурһульмудт эсвин, физикин, һазадын келнә болн нань чигн кичәлин багшнр күртҗәхш, селәдт бәәтхә, хотл балһснд чигн тиим йовдл учрна. Терүг уурулхин төлә Хальмг ик сурһульд «Багшнрин академий» гидг төсв экләд күцәгдҗәнә, багш болх оютнрин төлә сән таалта көдлмшин көтлвр бүрдәгдв.

Багшин эрдм дасчадг оютнрт эндр ямаран неквр тәвгдҗәнә, терүнә көдлмшин һол күслнь ямр болхмб, баһчудыг багшин эрдмәр яһҗ соньмсулх кергтә гисн сурврмудт хәрү өгхин төлә төсвиг һардҗадг ик сурһулин багшнрин баг оютнрла харһҗ күүндҗәнә. Тер тоод райодла болн таңһчин бүрдәцслә бооца батлсна хөөн ода сурһульмудт көдлҗәдг оютнрла «төгрг ширән» сүүр кех шиидвр батлгдла.
Тиим сүүр одахн эсвин болн физикин дацңд болв. Оютнр багшлҗасн деерән Хальмг ик сурһульд эврәннь эрдмәрн цааранднь сурчана. Теднә төлә тогтагдсн сурһулин онц зураһар эдн медрлән гүүдүлнә. Сурһульмудт багшнр эс күртҗәхәс иштә эдн төрскн сурһульдан эс гиҗ райондан дөңгән күргхәр шиидв. Ода сурһулин җил төгссн бийнь эднә көдлмш чилҗәхш. Ик сурһульд чигн ода сессь эклсн бәәнә, терүнд бас белдх кергтә. Тиим болсн бийнь эдн эн харһлтд орлцхар хол райодас чигн ирв.
Күүндвр керг-үүлин таалд давв. Эсвин, физикин болн зәңгллһнә эв-арһсин дацңгин һардвр харһлтыг сән таалд бүрдәһәд, оютнран цәәһәр, шикр-балтаһар тоов. Харһлтыг гуманитарн дацңгин һардач Аббән Ольга болн ФМФИТ-ин толһач Сумьяна Елена һардҗ давулв. Оютнр хотл балһсна болн райодын селәдин сурһульмудт багшлҗана, тегәд түрүн дамшлтарн эдн хувалцв. Райодын болн сурһулин бүрдәцсин сурврар, теднлә бооца батлҗ көдлҗәдг оютнрин төлә «Иргч цагин багш» гидг клуб тогтахар зуралгдҗана. Ик сурһулян төгсәһәд, бооца батлсн оютнр негн-хойр җилдән багшлҗадг баһчуд терүнд орхмн. Оютнр багшин көдлмшин тускар тоолвран келәд, эрдмнь эднд таасгдҗадг, эдн кергән улм сәәнәр күцәхәр седҗәдг санаһан медүлв.
Багшин эрдм шүүҗ авсн оютнрт Ольга Николаевна ханлтан өргв. Багшин эрдм ик күндтә, цааранднь чигн терүнә тоомср өөдләд бәәх. Сурһульмудын һардачнр тана көдлмшиг өөдәнәр үнлнә, тернь бас бахмҗта йовдл болҗана», - гиҗ эднә сурһмҗлгч келв.
- Мана харһлтд орлцсн эсв болн физик дасчадг оютнрас нань англь келнә, тууҗин, обществознаня, географин болн нань чигн кичәлин багшнр бәәнә. Эдн эсвин багшнр болҗ көдлҗәнә, эврә сурһульмудла бооца батлад, бас онц зураһар Хальмг ик сурһульд сурчана. Мана дацңгин хойр оютн ода балһсна сурһульмудт эсв, дәкәд негнь зәңгллһнә кичәлмүд давулна. Эдн Элстин 10-ч болн 15-ч сурһульмудт көдлҗәнә. Удл уга эдн Хальмг ик сурһулиг төгсәһәд цааранднь сурһульд бооцаһар көдлх. Нидн күүкд-көвүд физикин әңгд орснь байрта, эдн эмнлһнә физикиг дасч, нәрн кергслиг яһҗ олзлдгинь йилһдг мергҗлтнр болхмн. 2025 җилд тиим түрүн баг оютнр Хальмг ик сурһульд орв. Эдн физикин багшар бас көдлҗ чадҗана. Эсвин әңгиг эн җил төгсәҗәдг оютнр бас сурһульмудт көдлх, кен альд көдлхинь урдаснь йилһәд авв, - гиҗ дацңгин һардач Елена Владимировна темдглв.
Энүнә келсәр, ода таңһчд онц дамшлт күцәгдҗәнә. Тиигәд, район болһна даалһврар эсвин багш болх 1-2 абитуриент бооцаһар Хальмг ик сурһульд йовулгдх. Эдн ямаран сурһульмудт көдлхинь бидн райодын болн Элст балһсна һардврла йилһҗ авчанавидн. Эдн эсвин багшин эрдмәр сурх гиҗ дацңгин һардач цәәлһв.
Тер мет Хальмг ик сурһулин седвәрәр эсвин лагерь бүрдәгдв. Тенд дацңгин багшнр арвтнриг шаңһа шүүврт долан хонгин эргцд белдв, эдн эрк биш ик сурһульд орх. Ашлад келхлә, дацңгин һардвр эсвин багшнриг белдхдән белн бәәнә, терүнә төлә цуг таал тогтаҗана. Баһчудла бооца батлсн райодын болн сурһульмудын һардвр теднә туст дааврта болна.
Тер мет сурһульмудт көдлҗәдг кесг мергҗлтнрәс зәрмнь эсвин болн физикин багшнр болтха гиһәд тедниг шишлң сурһульд белднә. Эн җил 30 күн нег җилин туршарт сурв. Ирх җилд бас 20 күн мергҗлтән өөдлүләд, эсвин багшин хату цаас авх. Теднә сурһулин мөңгинь таңһчин залвр даав. Тиим кевәр эсв болн физик дасхлһна чинрнь өөдлх. Тиим даалһвриг ода Әрәсән залвр цуг сурһульмудт, орн-нутгин регионмудт тәвҗәнә. Ашлад келхлә, эсвин болн йиртмҗ шинҗлдг нань чигн кичәлин багшнриг белдлһн ик дааврта керг болҗана. Тиим халхар сурһульчнрин медрлинь гүүдүлҗ инженерин, өдгә цага эв-арһсин мергҗлтин эрдм дасч автха гиҗ теднд сән белдвр өгх кергтә.
ТҮРВӘН Һуна

Видео