«Җаңһр» театрин шин наадд

Сегодня, 14:31 | Общество, Таңһчин зәңгс, Зіњг

«Җаңһр» наадһасин театр эклҗ көдләд, дигтә тавн җил болҗана. Тавдгч селгәндән театрин җирһл соньн болв. Җилин йовудт тәвгдсн нааддын болн үүдәгч нань чигн үүлдврин тускар театрин һардач Кема Бередина мана зәңгчд келҗ өгв.
– Театрин тавдгч селгән соньн болсарн тодлгдв. Мана коллектив зурһан наадыг белдҗ тәвв. Театрин тәәз деер, нань чигн талвңд ут тоодан 252 наадн үзүлгдв. Цуг тер нааднд болн үүдәгч нань чигн олн үүлдврт 15 миңһн хәләһәч орлцснь маднд байрта болв.
– Кема Николаевна, театрин хоорндк залһлдан батрҗахинь бидн үзҗәнәвидн.
– Тиим, театрин үүдәгч залһлдан цаарандан делгрәд йовна. «Ик гастрольмуд» гидг шаңһа ик төсвд орлцад, Бурятин театрла нөкцҗ үүлдвидн. Ах-дү республикәс ирсн театр тавн хонгтан мана тәәз деер нааддан үзүлв. Үүдәгч коллективсин харһлтс сәәнәр давв. Удл уга эн сард мана театр Бурятьд одхмн.
- Чинртә талдан ямаран йовдлмуд учрв?
– Мана театрин долан көдләч театрин үүлдәчнрин ниицәнә мөрә авснь ик байрта йовдл мөн. Әрәсән СТД-н 150 җилин өөнлә артистнрин, үүдәгч көдләчнрин үүлдвр тиигҗ үнлгдснь урмдта болҗана. Үүдәгч соньн төсвс күцәхд тернь ик туста. Сойлын болн билг-эрдмин баһ наста үүлдәчнрт нерәдсн Әрәсән Залврин мөрә театрин артист Манҗин Даниил авснь бас бахмҗта болв.
Мана театрин студьд сурчадг бичкдүдин күцәмҗ мадниг бас байрлулҗана. Җилин туршарт 20 бичкн сурад, сурһулин җилән сәәнәр төгсәв. Мууһар соңсдг, чикнь хату 10 бичкн һурвн сардан актерин эрдмлә таньлдулдг түргн сурһулиг сурад һарв. «Би соңсчанав» гидг бүрдәцлә хамцу эн көдлмш күцәгдлә.
- Давсн селгәнә тускар бидн ахрар келвидн. Эн селгәнд хәләһәчнртән белдсн тоотын тускар келҗ өгтн.
– Зуни амрлһна дару бидн үүлдврин шин девсңгән эклвидн. Краснодар балһсна наадһасин театрин билг-эрдмин һардач, режиссер Дмитрий Лемберский «Как Маша поссорилась с подушкой» гидг наадыг белдҗ тәвв. Театрин үүлдвртән талдан шин янзс олзлхар бидн шуннавидн. Үүдәгч залһлдан мана кергиг уралан йовулхд туслхнь лавта.
Хамцу үүлдвр күцәмҗтә болдг. Иигәд «Рикки Тикки Тави» гидг наадыг Санкт-Петербургас ирсн режиссер Екатерина Ложкина-Белевич белдҗ тәвлә. Наадн мана хәләһәчнрт икәр таасгдв.
- Эн наадан театр нарт-делкән наадмд үзүлх гиҗ соңславидн.
– Наадһасин театрмудын нарт-делкән III наадмд эн наадан үзүлхәр белдҗәнәвидн.
Москвад дәкн бичкдүдин ик наадмд орлцад, хотл балһсна наадһасин театрин тәәз деер «Рикки Тикки Тави» наадан бичкдүдт үзүлхвидн.
Дәкәд болхла, театрин артистнр Улан-Удэ балһснд «Карлик Нос», «Сар Герл» болн «Мойдодыр» гидг нааддан үзүлхмн.
- Кема Николаевна, «Җаңһрин» үүдәгч нань чигн зурасла бичкн хәләһәчнриг таньлдулхмн.
– Хулһн сард «Ромео и Джульетта» наадна белдврин көдлмш күцәхвидн.
«Любовь и голуби», «Онегин» болн «Утиная охота» нааддт шин артистнр орулгдхмн. Хәләһәчнрт таасгдсн эн нааддыг мартх зөв угавидн.
Өдр-бүрин үүдәгч көдлмшлә зергднь театрин коллектив шин наадд белдхмн, гастрольд йовхмн, соньн нань чигн төсвс күцәхмн. Таңһчин болн Элст балһсна сойлын җирһлд шунмһа кевәр орлцҗ, олн хәләһәчнрән байрлулхдан белн бәәнәвидн.
Күүндснь ХӨӨЧИН Галина

Видео