Эрмдгтә улсин төрмүд хаһлад

Сегодня, 13:01 | Общество

Хальмг Таңһчин Толһачин медлд бәәдг эрмдгтә улсин төрмүдин Хүүвин сүүр шидр Элстд болв. Залврин Ахлачин дарук Олзәтин Марина энүг һардҗ давулв.

Таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян, эрүл-менд харлһна министрин үүл дааҗадг Мушаран Арслң, Хальмг Таңһчд күүнә зөв харсдг күцц зөвтә элч Валерий Чуб, Элст балһсна һардврин толһачин дарук Довгопола Дмитрий болн олна бүрдәцсин элчнр сүүрт орлцв.
Эрмдгтә бичкдүдлә көдлмшт тьютор мергҗлтин чинр, цергә шишлң керг-үүлдврт орлцачнриг шишлң техникәр тетклһн, йовһар йовдг хаалһст сән кец-таал тогталһн болн нүднә харань муурсн Цугәрәсән ниицәнә үүлдврин тускар, ут тоодан дөрвн төр босхгдв.
Тьютор мергҗлтин көдлмшин тускар таңһчин сурһуль-эрдмин болн номин министрин дарук Мацга Эльзята цәәлһҗ келв.
–Мана таңһчд сурһуль-эрдмин бүрдәцст ут тоодан 158 тьютор 208 көвүн-күүкнлә көдлнә. Өвәрц бичкдүдлә көдлмшт онц эв-арһ олзлх кергтә. Эн туст ирлцңгү көдлмш даңгин бүрдәгднә, – гиҗ Эльзята Муняевна темдглв.
Тер мет Олзәтин Марина шишлң мергҗлтнр белдлһнә туст һурвн җилә зура тогтахар даалһсн болдг.
Дарунь СВО-н йовудт күндәр шавтсн дәәчнрин төр хәләгдв. «Төрскән харсачнр» саңгин хәләврт бәәдг улсиг шишлң техникәр яһҗ теткгдҗәхин тускар цәәлһвр өггдв. Сүл цагт 37 ветеран шишлң техникәр теткгдсн болв. Иим дөң авхин төлә шаңһа саңд ирәд, эрлһән орулх кергтә. Ирлцңгү дөң-нөкд күрглһнд социальн зүүцүләчнрин көдлмш ик чинр зүүнә, гиҗ сүүрин йовудт бас онц темдглгдв. Терүнәс нань эрмдгтә улсиг болн цергә шишлң керг-үүлдврин ветеранмудыг көдлмшәр тетклһнә көтлвр бүрдәхиг даалһвр өггдв.
Эрмдгтә улсин төлә йовһар йовдг хаалһст сән таал тогталһна төр бас хәләгдв. Элст балһсна һардврин толһачин дарук Довгопола Дмитрий эн туст цәәлһвр өгв. – 2025 җилд Элстд ик аһу көдлмш күцәгдв. Балһсна хаалһс, йовһар йовдг хаалһс ясгдад, сән кец-таал тогтагдсинь олн-әмтн үзв. Тер мет эрмдгтә улсин төлә 638 светофор ирлцңгү тоотар теткгдв. Цуг эн чинртә көдлмшиг ирлцңгү бүрдәцсин һардачнр бүртксн болдг, – гиҗ Дмитрий Сергеевич келв.
Сүүрин чилгчәр нүднә харань муурсн Цугәрәсән ниицәнә Хальмгин әңгин үүлдврин тускар илдкл олнд соңсулв. Күцәгч йосна болн талдан бүрдәцслә залһлда бәрлһнә төр босхгдад, цаарандан кех-күцәх көдлмш батлгдв.

КАРСАНА Евгения

Видео