Өнр-өсклң бүлмүдиг дөңнәд

Сегодня, 09:56 | Общество, Таңһчин зәңгс, Зіњг

Олн үртә, өвкнриннь авъяс хадһлдг, ниитә, седвәртә болн олна бәәдл-җирһлд шунмһаһар орлцдг өрк-бүлмүд орн-нутгин бат ул мөн гиҗ Әрәсән Президент Владимир Путин темдглҗ, өнр-өсклң бүлмүдин то өсх зөвтә гиҗ келнә. Сүл җилмүдт орн-нутгин һардвр нилхд төрлһиг урмдулҗ, олн үртә өрк-бүлмүдиг дөңн¬лһнә керг-үүлдврмүд батлҗана.
«Өрк-бүл» гидг келн-улсин төсвин медлд олн үртә эк-эцкнр үрнәннь төлә демин мөңг авна. Мана таңһчд сүл тавн җилин эргцд олн үртә өрк-бүлмүдин то бас өсчәхнь темдгтә. Эндр мана таңһчд бәәдг 68 миңһн өрк-бүлд 130 миңһн күүкн-көвүн өсчәнә. 2018 җилд 5185 олн үртә өрк-бүл бәәсн болхла, ода теднә то 9 миңһнд күрв. Мана таңһчд олн үртә өрк-бүлмүдиг дөңнлһнә туст 20 онц керг-үүлдвр батлгдсн бәәнә, ут тоодан 4,9 җува арслң җил болһн йилһгднә. Хальмг Таңһчин Улсин Хуралын (Парламентин) депутатнр олн үртә өрк-бүлмүдин социальн теткврин туск заканд сольвр орулсна ашт дунд сурһулин бүрдәцд сурдг олн үртә өрк-бүлмүдин арвтнр халун хотар тетклһнд сар болһн 1254 арслң авдг болв, сурһульчнрт болхла олна көлгәр йовхин төлә сар болһн 600 арслң һарһгдна. Тер мет олн үртә өрк-бүлмүд коммунальн туслмҗин һару даңцалһнд авдг демин мөңгн деерән бат ясвр келһнд болн гер-бүүрин тетклһнд бас немр мөңг авдг болв.
Олн үртә өрк-бүлмүд олнд үлгүр-үзмҗ болхин төлә кесг марһас, наадм мана орн-нутгт давулгдна. Тиигәд, «Җилин сән гисн өрк-бүл», «Энтн мана өрк-бүлин авъяс» гидг марһас, өркән өндәлһҗәдг баһчудын наадм болн нань чигн керг-үүлдврмүд орн-нутгин сән гисн өрк-бүлмүдиг хамцулҗ, билг-эрдмән, өвкнриннь сойлан, авъясан делгрүлхд туслна. «Җилин сән гисн өрк-бүл» гидг орн-нутгин марһанд диилвр бәрсн өрк-бүлмүд дунд мана таңһчин элчнр җил болһн заагддгнь бахмҗта. Тәвн һар җилдән хамдан ниитә, олн үртә, баһ наста болн селән һазрт бәәдг өрк-бүлмүд төрскн таңһчин нер дуудулна. Үстин района Цаһан Амн селәнд бәәдг зурһан үртә Боктаевихнә өрк-бүл эн җил «Җилин сән гисн өрк-бүл» болн «Энтн мана өрк-бүлин авъяс» гидг орн-нутгин марһаст орлцад, дииләчнрин тоод орснь ончта йовдл мөн.
Өнр-өсклң болн баахн өрк-бүлмүдиг гер-бүүрәр тетклһнә төрмүдт орн-нутгин һардвр бас онц оньган тусхана. Әрәсән Залврин тогтаврас иштә һурвдгч болн дарук үрнь һарсн өрк-бүлмүд гер-бүүрин таалан ясруллһнд мөңг өгъәлҗ авсн болхла, терүг даңцалһнд шаңһас 450 миңһн арслңга дем авна. Эн җилин хулһн сарас авн олн үртә өрк-бүлмүдт ипотекин мөңг авлһна туст шинрлтс орулгдв. Өрк-бүлин олз-ору икдүллһнә төр бас орн-нутгин һардврин оньгт бәәнә. Тиигәд, баһ тетквртә бүлмүдт дөң күргхин төлә социальн бооцана көтлвр эврә керг бүрдәҗ олзта-орутаһар үүлдхд туслна. Өркән өндәлһсн оютнрин үрнднь бас дөңцл мөңгн өггднә. Әрәсән Президентин шиидврәр көдлдг эк-эцкнрт җил болһн алвна зәрм хүвинь даңцалһна туск закан батлгдв. Тиигәд, хойр үртә эк-эцкнр 2026 җилин эклцәс авн оруһин алвна мөңгнәс 6 процентинь хәрү авдг болв.
Шидр Әрәсән Президент Владимир Путин олн үртә өрк-бүлмүдин төлә онц зөвин керг-үүлдвр батллһна туск «Негдсн Әрәсә» партин седвәриг дөңнәд, орн-нутгин залврт бар сарин 1 күртл эн төр хаһлхиг даалһв. Тиигәд, олн үртә өрк-бүлмүд хаалһд җилд нег дәкҗ өңгәр йовдг болхмн. Эн долан хонгин эклцәр демографин төрәр болсн сүүрт орн-нутгин толһач «Өрк-бүлин ипотек» гидг көтлврин йовудт олн үртә өрк-бүлмүдт гер-бүүрин таал ясруллһнд мөңг өгъәлҗ авлһна кемҗәнд сольвр орулх неквр тәвв. «Олн үртә өрк-бүлмүдиг дөңнлһнә болн нилхд төрлһиг урмдллһна керг мана орн-нутгин төлә һоллгч төрмүд мөн. Өнр-өсклң бүлмүд - Әрәсән бат иргч», - гиҗ орн-нутгин толһач темдглсн болдг.

БАТАН Наталья

Видео