Сентябрин 5 - келн-улсин бичлтин ґдр

Сурєулин љил эклід, сурєульчнр болн багшнр тґвкнід медрлин хаалєдан орсн кемлі Хальмгт келн-улсин бичлтин ґдр темдглгдні. Эн байрта ґдр Зая Пандитан нернлі залєлдата. Гўн номта лам болн ик медрлті номт, шаљна ўўлдіч болн гегірўліч Оєтурєин Дала Зая Пандит «Тод ўзг» ўўдісн ик чинрті йовдлла бичлтин байр темдглгдні. Нерті ґґрд номтын ухани зґґриг хадєлад, цааранднь делгрўлх даавран медљ тањєчин імтн бичлтин ґдрін темдглні. Хальмг улсиг оюни ик чинрті зґґрлі таньлдулад, кўмни сі хіігч болн ґр-ґвч седклин номин хаалєд орулсн алдр номтиг цуг ўйин улс кўндлні. Зая Пандитан дўриг зурачнр ўўдіні, номин ўўдіврмўдинь номтнр арднь орљ шинљлні. Сурєулин заведенсір ґґрд ик ухатлын намтрла таньлдна, «тод ўзгиг» дасна.

Келн-улсин бичлтин ґдриг темдгллєн баєчудыг улсин байн тууљла таньлдулна, тґрскнч седклті болдгиг сурємљлна. Моєлцг єазр деер бііх олн келн улсин ик зунь эврі бичлт уга біісн цагт кўнкл ухатл Зая Пандит хуучн моњєл бичлтд шинрўллт орулад, ґґрд бичлт «тод ўзг» бўрдіснь цаг давсн бийнь чинрін геедго алдр ўўлдвр болљана. Тегід чигн Зая Пандитан болн ґґрд нань чигн ик ухатлмудын кергиг цаарандань делгрўлљіх эндрк ўйин улст эннь ик бахмљ болн ухани чилшго зґґр болљана.