Кўчін негдўлід гемиг диилхмн

09-04-2020, 14:52 | Общество

Коронавирус COVID -19 гидг хальдврта гемір Китд орн-нутгт імтн гемнсн цагт зуг карантин зарлгдсна хґґн, імтн терўніс сагллєна керг-ўўлдврмўд кўцідг болсна хґґн біідл ясрв. Тегід кўн болєн бийін чикір бірхлі, эмчнрин селвгиг кўціљ бийиннь болн ґґрхн улсин тускар ухалад чик авг-бірцір бііхлі эн гем цааранднь тўгшго болљана. Тер тґлід Ірісін Президент Владимир Путин мана орн-нутгин імтн цаг зуур гертін біієід, єазаран кергті болхла єархиг некід, олн улс цуглрдг єазрт одхасн саглхин тґлі амрлєна ґдрмўд зарлсмн. Президентин шиидврір амрлєна ґдрмўд эн сарин чилгч кўртл батлгдв.

Урдк кевір ўўлдљіні...

Эн ґдрмўдт бидн гертін біієід, урднь хооран саасн кергўд кўціљ, цаган тустаєар олзлхар шунљанавидн. Імтні икнкнь карантина некврмўд кўціљ гертісн зуг хулд кехір, аптекас эм авхар єарна. Хотл балєсна уульнцст імтн хая ўзгдні, олна кґлгн-кўчн йовдган уурв, сойлын, сурєуль-эрдмин, бііц тетклєні учрежденьс ўўлдврін зогсав. Эн ґдрмўдт эрўл-менд харлєна, хулд-гўўлгіні болн жилищн-коммунальн эдл-ахун кґдлічнр урдк кевірн ўўлдљіні. Шидр тањєчин эрўл-менд харлєна министр Кикені Юрий зіњглсір, бичкдўдин медицинск тґвин, гўлгн геміс хґрлєні диспансер, тањєчин эмнлєн, балєсна поликлиник,райодын больницс урдк кевір імтнд дґњгін кўргљіні. Болв хамгин ик даавр хальдврта гемин эмнлєні кґдлічнрт учрв. Эдн коронавирус гемір гемтснд харлљах улсиг эмнљіні. Тер тґлід эдні эрўл-менд харлєн эркн чинрті тґр болљахиг министр заав.

Іімшгті геміс саглх кергті

– Шидр мана тањєчд немр лабораторь ўўлдврін эклв, тегід эрўл-менд харлєна кґдлічнр долан хонг болєн шинљллтд ордг болхмн. Тер мет тањєчин імтн шинљллт кељ, эн гем илдкљ авхин тґриг хаєлљанавидн. Ода мана орн-нутгт коронавирус гем илдкљ авдг 3 онц эзні лабораторь бііні. Тедніс негнь мана тањєчд туслмљан кўргхин тускар медўлв, бидн теднлі нґкцљ ўўлдхин тускар кўўндвидн. Болв тенд нег шинљллт келєн 700 арслњ кўрні, тањєчин імтні ухан-тоолвр медљ авсна хґґн бидн теднлі бооца батлхвидн. Тер цагт кўн болєн эврі мґњгірн шинљллт кеєід, эн хальдврта гемір гемтсін аль угаєан медљ чадхмн, – гиљ Юрий Викторович шуд залєлдана йовудт келв.
Роспотребназорин тањєчар ўўлддг заллтын єардач, ах санитарн эмч Санљин Љањєрин келсір, эдн хулд-гўўлгіні объектмўдт, аптекст болн АЗС-т санитарн некврмўд ямр кевір кўцігдљіхиг бўрткні. Ода імтн нег-негнісн кўсдундур метрт зогсх, цуєар эрк биш маск ґмсх зґвті. Болв бўртклєні керг-ўўлдврмўдин йовудт зірм лавкст эн некврмўд кўцігдљіхш гиљ санитарн ах эмч келід, кўн болєн хамгин тўрўнд саглуллєна керг-ўўлдврмўд кўціх зґвтіг дікід нег тодлулв. Зуг эн ґдрмўдт коронавирусар гемтсн залу кўўнлі харєад, терўніс хальдсн аль угань медгдід уга улс обсерваторас зулад кесг кўўнд ик іімшг учрасна туск зіњг імтиг ўўмўлв. Ірісін орн-нутгин Хўўвин депутатнр иим улсиг засгла харєулхин туск зака батлсн бийнь эдн иим ичрті йовдл єарєв. Хґрн ніімті кўўкд кўн болн баахн хойр залу ґґрхн улсин, тенд кґдлљіх эмчнрин тускар эс ухалснь йир єундлта. «Мана ах ўйин улс љирєлин хаалєдан кўчр зовлњ ўзв, болв тер бийнь эдн цуг тўрў-зўдўг дааљ єарв. Эдн болхла эмчнрин хіліврт біідг болв чигн, хот-хоолта, му-сін болв чигн дулан цевр єазрт цаг зуур бііхісн зулљ, кесг імтн эдніс хальдх гиљ ухаллго иим йовдл єарєснь маш єундлта», – гиљ Кикені Юрий келв.
Бидн хамдан

Болв эн кўнд цагла цаєан саната, буйнч седклті болн седвірті улс олн бііхин тускар онц келх кергті. Москва балєснд біідг мана нег єазра улс болн Ірісін Президентин медлд Хальмг Тањєчин элчлтин олна хўўвин гешўд эн хальдврта геміс хґрлєнд дґњгін кўргхір шиидід, тањєчин эмнлєсин тґлі кесг кергті тоот хулдљ ґгв. Бакан Намру, Манљин Юлия, Церні Ольга, Ханташа Чињгс, Бочан Дугла болн нань чигн улс эн керг бўрділєнд шунмєаєар орлцв. Тер мет эн седвірин тускар Тарбан Санєљ болн Башанкан Бадм социальн сетьмўдт келід, дґњгін кўргх саната улст дуудвр кесн билі. «Богдо» гидг олна нииціні гешўд болхла тўргн дґњ кўрглєні станцин болн хальдврта гемин эмнлєні кґдлічнрин тґлі саглуллєна эв-арєс бас хулдљ ґгв. Хальдврта геміс хґрлєні кергт Бурхн Багшин Алтн сўмин ламнр бас демін кўргв, эн цагла хурлд ирлго гертісн мґргўлд орлцхин тґлі ґдгі цага эв-арєс олзлљ ўўлдљіні. Одахн тањєчин ресторатормудын нииціні гешўд хальдврта гемин эмнлєнд эн ґдрмўдт амрлєн угаєар кґдлљіх эрўл-менд харлєна кґдлічнриг халун хотар теткх санаєан медўлв. Ставропольск крайд біідг Борис Хачиров эврі мґњгірн тањєчин эмнлєні учрежденьсин тґлі антисептическ эв-арє белглв. Эн тґрскнч седклті, ўнн чик хіліцті баахн арєлач аав-ээљиннь санлд нерідљ Элстин барун ўзгт босха тосхсна тускар мана газет бичсн билі. Городовиковск района арєлачнр болн фермермўд тенд бўрдігдсн обсерваторин тґлі орна ґлг-эд болн маск уйхин тґлі демін кўргљ, олна кергт орлцв. Кикені Юрий цуг эн улст ханлтан ґргљ, эдні седвіриг ґґдінір ўнлв. Болв імтніс мґњг цуглулх керг уга, тањєчин Толєач Хаска Батун шиидврір бюджетіс эн геміс хґрлєнд мґњгн йилєгдв, ИВЛ-аппаратмуд бііні, 500 єар кў эмнлєні болн эрўл-менд харлєна кґдлічнриг сагллєна кегдлмўдір тетклєні тґлі кергті тоот бііні гиљ темдглв. Эн ґдрмўдт сін дурар ўўлддг улс, нурєлљ баєчуд медітнрин сурврар хулд кељ, хот-хол, эм болн нань чигн кергті тоот гертнь кўргљ ґгчіні. «Бидн хамдан» гидг дуудвртаєар эдн буйнч седклин керг-ўўлдврмўд кўціљіні. Иим ўлгўрмўд олн бііні гиљ келх кергті. Зуг нег-негндін килмљін тусхаљ, кен ахан кўндлід дґњгін кўргљ, ґґрін бііх улсин тускар ухалљ, іімшгті геміс саглхла бидн імд-менд бііхвидн.

ДООЉАН Наталья

Видео