Сән чинртә эдл-ууш кеҗ һарһхар

Сегодня, 14:56 | Общество, Таңһчин зәңгс, Зіњг, Селәнә эдл-аху

Тохма малын Әрәсән һәәхүлин йовудт болсн олн зүсн харһлтст болн сүүрмүдт хойр зун шаху шинҗләч, Әрәсән селәнә эдл-ахун Министерствин мергҗлтнр, хөд өсклһнә халхар келн-улсин ниицәнә гешүд, АПК-н заллтын регионмудын элчнр орлцснь темдгтә болв.
Олна дөңнлтин штабин ул деер хөд өсклһнә халхар келн-улсин ниицәнә гешүдин хург болв. Мана орн-нутгин дамшлтта мергҗлтнрин, шинҗләчнрин, номтнрин, хөд өскчәдг эдл-ахусин элчнрин орлцлһтаһар өргн күүндвр болсинь заахмн. Терүнд Б.Б.Городовиковин нертә Хальмг ик сурһулин һардач Салан Бадм, аграрн дацңгин һардач, селәнә эдл-ахун номин доктор Натра Аркадий бас орлцв.
Өдгә цагт Хальмгт кесг арвад бордлһна талвң сән йовудтаһар көдлҗәнә. Малан асрад, сән чинртә махар нег һазра улсан теткәд, тер мет орн-нутгин хот-хоолын әәмшг уга бәәдл тогталһнд мана фермермүд ач-тусан күргәд бәәнә.
Хөд болн ямад өсклһнә эндрк өдрин тогтсн бәәдлин тускар ирлцңгү бүрдәцин һардач Харон Амерханов тодрхаһар цәәлһҗ келв. Салан Бадм болхла хальмг вузин улд номин-методическ төвин үүлдврин тускар зәңглв. Сүл җилмүдт тенд номин болн селекцин халхар ямр төсвс күцәгдсинь заав.
Харһлтын йовудт хөд өсклһнә халхар күцәмҗтәһәр көдлҗәдг фермермүд дамшлтарн хувалцҗ, тер мет ирлцңгү ниицәнә ханьд шин гешүд батлгдв.
Тер өдр Әрәсән һәәхүлд орлцачнрин дунд хөд кирһәчнрин марһан болв. Китд орн-нутгин Beiyuan бүрдәц энүг давулв. Келхд, эн бүрдәц хөд кирһдг олн зүсн кергсл кеҗ һарһна. Һучн тавн күн марһанд орлцад, эв-дован болн эрдмән үзүлв. Марһана жюрин ханьд орсн улс хөд кирһәчнрин көдлмшинь болн ноосна чинринь үнләд шиидвр һарһсн билә. Түрүн ормс эзлсн тавн күн шишлң кергсләр ачлгдв.
Эн һәәхүлин ашлгч керг-үүлдврмүдин тускар даруһас зәңглхвидн.
КАРСАНА Евгения

Видео