Дууллєна ґвірц янзта дуучнр Элстўр ирљіні

16-08-2014, 13:01 | Культура

Августын 24-д арт-делкін фестиваль Элстд болхмн. Тернь йир соньн фестиваль болх гиљ кўлігдљіні. Дууллєна ховр болн ґвірц нег янзар дуулдг дуучнр Хальмгт цуглрљ ирхмн. Хірнь тегід мана олн хілієічнр хоолан шахљ дуулдг, талданар келхлі хґркрљ дуулдг дуучнриг ўзід, тедні ду соњсх байр учрљана. Фестиваль бўрдієічнрин нерн дееріс соньн эн ўўлдврин тускар тґсвин кґгљмин єардач Аздын Лиљ маднд келљ ґгв.

Эн фестивалиг белдљіх улс «Теегин ки» («Степное дыхание») гиљ терўгін нерідв. Йириндін ямаран чигн дуунд ґґр эргндк біідлин тускар келгдні. Хґркрін нег ўлў йиртмљлі нірн кевір залєлдата болна. Тегід Элстд болх фестиваль соньн эн янзар дуулдг улсла таньлдулсн деерін тер дуучнриг мана теегин серўн аєар киилўлљ, шарлљна ўнрт толєаєинь диинрўлхір бііні.

Хоолан шахљ дууллєна тускар, эн эрдмиг сергіљ делгрўлєлні тускар урднь бичсн билівидн. Тер цагас авн Элстд эн эрдмір соньмсљах баєчуд дунд белдврин кґдлмш кегдлі. Эн эрдмд оньган ґгід, арднь орљ сурсн баєчудыг эн фестивалин йовудт соњсх арє учрљана. Тедніс нань Хальмг Тањєчас «Хурдн сарва» гидг ансамбль орлцљана. Эдн ода белдврин кґдлмш кељіні. Шинљіні єазрин нерн дееріс фестивальд Хальмг университетд сурчах Нимгрин Байрта орлцхмн. Ут ду эн дуулх саната. Байртан экнь ут дууна туст ик эрдмті дууч болљ Шинљінд нер єарсмн. Билгті кўўкд кўн найн ут ду медні. Ода экин эрдмиг кґвўнь цааранднь йовулљ йовна.

Барун Моњєлас фестивальд ирљ, бає наста дууч Даваасурен Дамљин дууєарн імтиг байрлулхмн. Билгті кґвўн хґркрініс нань лимб болн мґрн-хур татна. Эн эрдмін чигн Элстин олн хілієічнрт ўзўлхмн.

Уулын Алтайяс Мерген Тельденов ирхір бііні. Эврі єазртан нерті дууч, олн марєана лауреат болљах Мерген келмрч, туульч, дууч улс дундан тоомсрта кўн болљана.

Фестивальд кўндті гиичнр болљ нерті олн дуучнр орлцх гиљ кўлігдљіні. Хол єазрас ирљіх нерті дуучнр фестивалин кемљінд мастер-класс бўрдіљ, эрдмісн дасхх саната. Тедніс сурємљ авх седклті улс эн фестивалин кґгљмин єардач Аздын Лиљд љињўлљ чадљана. Телефона тойг: 89615436651.

Хальмг улсин мартгдад біісн ховр дуудыг хураєад, тґсвин єардачнр шишлњ диск фестивальла ирлцўлљ белдљ єарєв.

Видео