Экологическ зуульчллєна туск марєан

Ут-тоодан чинрті эн марєанд 34 команд орлцсмн. Тедніс 33 тґсв финальн іњгд шўўљ авгдв. Долан федеральн округин 30 єазрин экотуризм делгрўлљіх организацс орлцснь соньн. Иим олн тґсв дунд эврі ончрлтан медўлні гисн амр биш. Хол Дорд ўзгин федеральн округ марєанд орулсн тґсвіс долань финалд єарв. Приволжск федеральн округас зурєан тґсв орв. Ар-Деед ўзгин, Центральн болн Сибирск округас тавад тґсв шўўљ авгдв. ЮФО-єас дґрвн тґсв финалд єарв. Уральск федеральн округин хойр тґсв сўл марєанд орлцхмн. Финальн марєанд орсн командс, тер тоод Хар єазрин заповедник шишлњ белдсн кґтлврт орлцад, тґсвін цуг халхарнь янзлулљ, немр орулљ, аштнь тґсвин презентац болхмн. Терўнднь инвестормуд болн министерствсин болн ведомствсин элчнр орлцљ, ямаран тґсвиг дґњљ, мґњгні тетквр ґгхнь медгдхмн. Иигід марєан йосндан ик туста болљана. Юнгад гихлі, терўні ашар цуг халхарн диглгдсн, кедў мґњгн єархнь тоолгдсн экономическ дигті тґсв ўўдљ, экологическ зуульчлє делгрўллєнд ик дґњ кўрггдљіні. Марєан октябрин 16 кўртл болхмн. Аштнь 10 єазрин экозуульчлє делгрўллєні тґсвс йилєљ авгдхмн.

УШКАНА Сувсн