Гер-бүүрин тускар күүндв

22-09-2020, 14:03 | Таңһчин зәңгс » Хальмг Тањєчин Толєачин ґдр-бўр

Одахн Хальмг Таңһчин Толһач Хаска Бату таңһчин правительствин гешүдлә гер-бүүр тосхлһна, хуучн гермүдәс әмтиг нүүлһҗ авлһна болн тосхлтд мөңгән орулад меклгдсн улсин зөв харслһна төрмүдәр селвлцә давулв.
Хуучрад унҗах гермүдәс әмтиг нүүлһҗ авлһна туст батлгдсн зура зуг 30 процентд күцәгдв гиҗ селвлцәнд келгдв. Ода Элст балһснд Некрасовин нертә уульнцд 26 патьрта гер тосхгдҗана, терүг эн җилин чилгчәр эдлврт орулхмн гиҗ зуралгдҗана. Эн хуучн гермүдт бәәдг улс патьрар теткгдхлә, тер цагт эн көтлврәр зуралгдсн керг-үүлдвр бүклдән күцәгдхмн.
- Эн җилин чилгч күртл әмтн эн герт шин патьрин түлкүр авхмн. Мана таңһч хуучрад нурад унҗах гермүдәс әмтиг нүүлһҗ авлһна көтлвриг бәәдл-җирһлд тохрахин төлә шин гер-бүүр тосхдг регионмудын тоод орсмн, - гиҗ Бату Сергеевич темдглв.
Тосхгдҗах гермүдт мөңгән орулад меклгсдн улсин зөв харслһна төр нәрн болҗана. Эн чинртә төр хаһллһна көдлмш «РФ-н Гер» гидг акционерн ниицәнлә хамдан күцәгдҗәнә. Эднә дөң-тусар эн җил мана таңһчд нег объектын тосхлт эклхмн. Терүг 2021 җилин зун эклтл эдлврт орулх кергтә гиҗ таңһчин Толһач неквр тәвв.
Таңһчин Толһач Хаска Батун келсәр, шин гер-бүүр тосхлһна диг-даран манад ик биш. Эннь кесг учрас иштә болна. Хамгин түрүнд, тосхлтын бүрдәцст гер-бүүриг олар тосххин төлә мөңгн күртхш. «Эн туст көдлмшән шунмһадулҗ, дигтә-даратаһар бүрдәх кергтә. Цаглань эдлврт эс орулгдҗах объектсин туст бәәдлиг ясрулх керг-үүлдврмүд батлҗ, дарунь эн төриг хаһлх кергтә. Ирх җилд хотл балһснд «Баһчудын» гидг микрорайонд тосхлтын көдлмш эклхмн, тегәд инвестормудын болн тосхлтын предприятьмүдин төлә урдаснь сән таал тогтах кергтә,- гиҗ таңһчин Толһач селвлцәг ашлҗ келв.

ДАВАН Наталья

Видео