Медәтнр саглх зөвтә

- Урдк кевәрн гемтсн улсин ик зунь күүкд улс болна. Нурһлҗ көдлҗәдг улс, эрүл-менд харлһна болн зөв-йос харлһна көдләчнр эн хальдврта гемәр гемтнә. Идр наста улс гемтә улсин 33 процент, 65 наснас ах улс тер кевәрн 15 процент тогтана. Эдн саглуллһна неквр күцәлго хаслһна диг-даран зарлгдсн болв чигн олн-әмтн цуглрдг һазрт оддг болҗана. Медәтнр эн гемиг күнд кевәр даана, тегәд гертән үлдҗ, бийән сәәнәр хәләх кергтә. Ода таңһчин госпитальмудт 796 күн эмнлһ авчана. Күнд бәәдлд 20 пациент бәәнә, теднәснь өрәлнь ИВЛ-аппаратар кииһән авчана, эднә әм аврхин төлә эрүл-менд харлһна көдләчнр цугинь кеҗәнә. Һундл төрхд, сүл хонгт эн гемәс көлтә сәәһән хәәсн улсин то икдәд, 190 болв, – гиҗ Джангар Николаевич келв.
Таңһчин госпитальмудт зәрм әмтн орм күртлго сиинцд кевтнә гисн зәңг социальн сетьмудт барлгдсна тускар эрүл-менд харлһна министр келв. «Зәрм әмтн райодт үүлдҗәдг госпитальд эмнлһ авхар седхш, зуг таңһчин эмнлһнд нанд орм йилһтн гиҗ сурна. Эдгсн улсин ормд эдн орна. Ода деерән таңһчин госпитальмудт 200 орм сул бәәнә», – гиҗ министр цәәлһв.
ОРВИ болн грипп гемин туст тогтсн бәәдлин тускар шуд эфирт бас келгдв. Таңһчин ах санитарн эмчин келсәр, сурһульчнр үвлин амрлһнд цаг-болзгасн урд һарснь эн бәәдлиг ясрулхд туслх чигн. Шин җиләс авн өдр болһн эпидемиологическ бәәдл шинҗлгдхмн. Кемр бичкдүд дунд хальдврта гемәр гемтсн йовдл икдхлә, сурһулин үүлдвриг ямр кевәр бүрдәхинь шиидхмн. Дунд болн ах классмудын сурһульчнр алс-зәәһин кевәр сурх чигн биз гиҗ дааврта һардач келв.
Шин җилин байрин өдрмүдиг зуг өөрхн элгн-садтаһан гертән тостн, нәр-нааднд бичә орлцтн гиҗ таңһчин ах санитарн эмч болн эрүл-менд харлһна министр дәкәд нег дуудвр кев.

БАТАН Сәәхлә